ئەرزان نەبوونا پانزینێ گرێدایی نەبوونا پارزنگەهێن كەرتێ گشتی یە
هەولێر، قائید میرۆ:
ئەندامەكێ لیژنا نەفت و غازێ ل پەرلەمانێ ئیراقێ خویا كر، بەری نوكە وان داخوازكربوو بهایێ پانزینێ ل پارێزگەهێن هەرێما كوردستانێ ژی بهێتە ئەرزانكرن، وەكی پارێزگەهێن ئیراقێ، بەلێ ژ بەر نەبوونا پارزنگەهێن كەرتێ گشتی پانزین ناهێتە بەلاڤكرن.
دكتۆر سەباح سوبحی، ئەندامێ لیژنا نەفت و غازێ ل پەرلەمانێ ئیراقێ بۆ رۆژناما ئەڤرۆ دیار كر، ئەگەرێ ئەرزان نەبوونا بهایێ پانزینێ ل هەرێما كوردستانێ بۆ نەبوونا پارزنگەهێن كەرتێ گشتی ل هەرێما كوردستانێ ڤەدگەڕیت و گۆت: «حوكمەتا ئیراقێ ژ بەر هەبوونا پارزنگەهێن سەر ب حوكمەتێ ڤە بهایێ پانزینێ ئەرزانكریە و پانزین ب بهایەكێ پشتەڤانیكری ل سەر پانزینخانان دهێتە بەلاڤكرن».
دكتۆر سەباح سوبحی گۆتژی: «بەری نوكە مە داخوازكربوو پانزین ب بهایەكێ ئەرزان ل هەرێما كوردستانێ ژی ل سەر شۆفێران بهێتە بەلاڤكرن، بەلێ پارزنگەهێن سەر ب حوكمەتێ نینن و هەموو ئەو پارزنگەهێن پانزینێ بەرهەم دئینن یێن كەرتێ تایبەتن، ئەڤە ژی ئەگەرێ سەرەكیە پانزین ل پارێزگەهێن هەرێما كوردستانێ مینا پارێزگەهێن ئیراقێ ب 450 دیناران نەهێتە بەلاڤكرن».
