ئەرمـەنستان خـوە بۆ شـەڕی بەرهەڤ دکـەت
ب، سه‌رجان مەحمود:
نیکۆل پاشینیان سه‌رۆک وه‌زیرێن ئه‌رمه‌نستانێ راگه‌هاند کو هه‌تا نها ژی ل گەل وەلاتێ ئازەبایجانێ پەیمانا ئاشتیێ نەهاتیە ئیمزا کرن و گۆت: (پشتی شه‌رێ قه‌ره‌باخێ ئاگربه‌سته‌ک دو ئالی ب ده‌ستپێشخه‌ریا رۆسیا هاته راگه‌هاندن، لێ مخابن هه‌تا نها ژی د ناڤبه‌را مه و ئازه‌ربه‌یجانێ دا په‌یمانا ئاشتیێ نه‌هاتیه ئیمزا‌کرن و ناکۆکی به‌رده‌وام دکه‌ن، ژ به‌ر ڤێ یه‌کێ ئالۆزیێن د ناڤبه‌را مه دا به‌رده‌وامه و نه دووره جاره‌کا دی ئه‌م نەچار بین شەڕی ژی بکەین، وەکو ئەرمەنستان ئەم خوە بۆ هەر ئەگەرەکێ بەرهەڤ دکەین).
سه‌رۆک وه‌زیرێن ئەرمەنستانێ هه‌روه‌سا راگه‌هاند ژی کو ژ ئالیه‌کێ ڤه رۆسیا و ل ئالیێ دی ژی ئێکەتیا ئۆرۆپا ژ بۆ چاره‌سەریه‌کا سیاسی و ئیمزاکرنا په‌یمانا ئاشتیێ د ناڤبه‌را وه‌لاتێ وان و ئازه‌ربا‌یجانێ دا بەردەوام د ناڤ بزاڤان دانە، لێ هه‌تا نها ژی بزاڤێن وان بێی ئه‌نجامن، چونکی هێشتا ژی پەیمانا ئاشتیێ نەهاتیە ئیمزا کرن و گۆت: (هەتا نها مە چەند جاران داخواز ژ بەرپرسێن ئازەربایجانێ کریە کو پەیمانا ئاشتیێ بهێتە ئیمزا کرن، دانوستاندن ژی بەردەوامن، لێ هەتا نها ئەو یەک بێی ئەنجام مایە، ژ بەر هندێ ژی نها پتر ژ هەر دەمەکێ مەترسیا شەڕەکێ نوو د ناڤبەرا مە و ئازەربایجانێ دا هەیە، وەکو ئەرمەنستان ئەم خوە بۆ شەڕی ژی بەرهەڤ دکەین).
ناڤهاتی د دووماهیا ئاخڤتنا خوە دا ئەو یەک ژی نەڤەشارت کو، وەکو ئەرمەنستان وان نەڤێت جارەکا دی شەڕ بکەن، لێ هەلوەستێ نها یێ ئازەربایجانێ ژی ناهێتە قەبوول کرن، ئازەربایجانێ دڤێت هندەک تشتان ل دژی ئەرمەنستانێ بکار بینیت، لێ سیاسەتا نها یا ئازەربایجانێ ل هەمبەر ئەرمەنستانێ دێ مەترسیێن خوە هەبن، وەکو ئەرمەنستان ئەم دێ نەچار بین ژ بۆ پاراستنا وەلاتێ خوە هەر تشتەکێ بکەین، شەڕ ژی ئێکە ژ وان ئەگەران و دڤێت ئەم بۆ شەڕی ژی بەرهەڤ بین.
ژ ئالیێ خوه ڤه ئیلهام عەلیێڤ سەرۆک کۆمارێ ئازەربایجانێ ژی راگه‌هاند کو وان په‌یمانه‌کا پێنج خالی دانه به‌ر ده‌ستێ ئه‌رمه‌نستانێ لێ هه‌تا نها ئه‌رمه‌نستانێ به‌رسڤه‌کا ئه‌رێنی نه‌دایه وان و گۆت: (ل پێشیا ئه‌رمه‌نستانێ یه‌ک ڕێ هه‌یه ئه‌و ژی ب فه‌رمی قه‌بووکرنا سنورانه و دڤێت ئەرمەنستان ل گۆر بریارا بەری نها یا نەتەوەیێن ئێکگرتی راستیا هەی قەبوول بکەت و بابەتێ سنۆرێن د ناڤبەرا مە دا دڤێت وەسا بهێتە چارەسەرکرن، هەکە ئەو یەک هاتە کرن وی دەمی چو ئاریشە د ناڤبەرا ئەرمەنستانێ و ئازەربەیجانێ دا نامینن، نها پتر ژ هەر دەمەکێ پێدڤیا هەر دو وەلاتان ب ئاشتیێ و ئارامیێ هەیە، ژ بۆ هندێ ژی دڤێت ئەرمەنستان ل گۆر راستیا نها سەرەدەریێ بکەت و وی دەمی ئازەریایجان ژی بۆ ئیمزاکرنا پەیمانا ئاشتیێ یا بەرهەڤە).
