ئەرکـێ کـۆمسیۆنا پەڕلەمـانی گـرنگ و دیرۆکی یە
سەرۆکێ پارتا کۆماریا گەل یا تورکیا دیار کر، پێکئینانا کۆمسیۆنا پەرلەمانێ تورکیا ژ بۆ دووڤچوونا قووناغا ئاشتیێ گەلەک گرنگە، وەکو پارتا کۆماری دەه ئەندامێن وان د کۆمسیۆنێ دا جه دگرن و بێگومان دڤێت ئێدی پەرلەمانێ تورکیا هەست ب ئەرکێ خوە یێ گرنگ و دیرۆکی بکەت، چونکی کۆمسیۆنا ل پەرلەمانی دێ کار بۆ چارەسەکرنا پرسەکا گەلەک گرنگ و دیرۆکی کەت و گۆت: (پرسا کوردی پرسەکا گەلەک مەزنە، ب سالانە ئەم دبێژین دڤێت پرسا کوردی ل پەرلەمانێ تورکیا بهێتە چارەسەرکرن، هەر ژ دەستپێکا قووناغا ئاشتیێ هەتا نها وەکو پارتا کۆماری ئەم هاریکارین و ئەندامێن مە یێن د کۆمسیۆنێ دا ژی دێ ب هەموو رەنگەکێ کار کەن دا بشێن یا پێدڤی بۆ قووناغا ئاشتیێ و چارەسەرکرنا پرسا کوردی ئەنجام بدەن).
ئۆزگور ئۆزەل ئەو یەک ژی دیار کر، وەکو پارتا کۆماری ئەو ژ نێزیکڤە دووڤچوونا قووناغا ئاشتیێ دکەن، چونکی گرنگە هەموو کارێن قووناغا ئاشتیێ ب رێیا پەرلەنێ تورکیا بیت و گۆت: (ب سالانە ئەم دبێژین دڤێت پرسا کوردی ل پەرلەمانێ تورکیا بهێتە چارەسەرکرن، نابیت چەند هێزەک د ناڤبەرا خوە دا هندەک بریاران بدەن و وەسا کار بکەن، ئەو یەک چو ئەنجامێن خوە نابیت، یا نها دهێتە کرن گرنگە و دڤێت پەرلەمان وەکو سازیەکا گرنگ کو نوونەراتیا هەموو خەلکێ تورکیا دکەت ژ هەر تشتەکێ ئاگەهدار بیت).
