ئەرێ ئەلیزا بێس تسوركۆڤ .. بۆ ئیراقـێ بۆمبەكـا تەوقیتكری نینە؟!
عەدنان رێكانێ
سیاسەتا برێڤەیرنا دەولەتێ وەكو هونەرێ سەرەدەریكرنا ل گەل قەیرانان دهێتە دنیاسین، كا چاوا ئەو سەركردە د بەرهەڤن هونەرێ د شیاندا هەتا چ ڕادە ل گەل هەر قەیرانەكێ چ یا سیاسی یا ئابووری ل وەلاتی بیت بكاربینن.
بێگومان ئیراق وەك وەلاتێ قەیران و شەڕان دهێتە نیاسین و دیرۆكا وێ ڤێ چەندێ دوپات دكەت، هەر ل گۆرەی بێرهاتێن مە داكو گەلەك دویر نەچین ل سالێن هەشتیان و هەتا نوكە وەلاتێ ئیراقێ چ رەحەتی و ئێمناهی نەدیتیە، شەڕێ هەرە مەزن ل چاخێ بیسی شەڕێ ئیراق و ئیرانێ بوو كو هەشت سالان ڤی شەڕی ڤەكێشا و ب ملیۆنەها خەلكی سڤیل و لەشكر ژی د ناڤبەرا هەردو وەلاتان دا بوونە قوربانی، ئانكو ل دەستپێكا هەلكرنا ئاگرێ وی شەڕێ و ئەگەرێن وی شەڕی نەپێگیریا ب رێككەفتنا جزائری یا شووم بوو، دەمێ رێككەفتن د ناڤبەرا ئیران و ئیراقێ هاتیەكرن، بۆ ژناڤبرنا شۆڕەشا كوردی ل ئیراقێ بەرامبەری دەستبەردانا ئیراقێ ژ رووباێ (شەتو لعەرەب)، بۆ ئیرانێ، پشتی دەستهەلاتا وی سەردەمیا ئیراقێ ئەو رێككەفتن بجه نەئینان، بوو ئەگەرێ سەرەكیێ شەڕێ هەشت سالان، د ناڤبەرا وان سالان دا و بتایبەت ل دوماهیا سالێن هەشتیان دا، زۆر كەس هاتنە گرتن و دەستەسەركرن وەك سیخۆر دهاتنە تۆمەتباركرن، ژ وان كەسان ژی (فەرزاد بازۆفت) كو رۆژنامەڤانەكێ بەریتانی بوو و ل پشت دەرگەهێن گرتی و كەس نەدیتی د رۆژەكێ دا هاتە دادگەهەكرن و گونەهباركرن و حوكمێ سێدارەدانێ ل رێككەفتی 10 ئادارا سالا 1990 هاتە سێدارەدان، هەر چەندە گەلەك وەلاتێن بیانی و هەتا نەتوەیێن ئێككرتی داخوزا ئازادكرنا وی دكرن، بەلێ دەستهەلاتا دكتاتۆریا سەدامی بیاكەسەكێ نەكرن، هەڤدەم هەڤكاراێ وی (باریش) ب 15 سالان هاتە زیندانكرن و ل 16 تەباخا سالا 1990 هاتە ئازادكرن پشتی چەندین گڤاشتنێن نێڤدەولی ل ئیراقێ هاتینەكرن، ب دیتنا من سێدارەدانا بازۆفتی ببوو ئەگەرەك ژ وان ئەگەران یێن ژ ناڤبرنا ڕژێما سەدامی و سەرەدەریا شاشا وی ل گەل وێ قەیرانێ، بەلێ نوكە ئیراقا دەستهەلاتا شیعی كو هەموو جونگێن وەلاتی ل ژێر دەستێن واندانە، ژبیركریە یان ژبیرا خوە دبەن، رۆژنامەڤانا ب ڕگەز ئیسرائیلی كو رەگەزنامەیا ئەمریكی هەیە بناڤێ (ئەلیزابێس سۆركۆڤ) هەما رەوش و هەمان كارێ رۆژنامەڤانی ل بەغدایێ بێ سەر و شوون بوویە، بەلێ هەتا نوكە چارەنڤیسێ وێ خانمێ نەهاتیە دیاركرن، نە بۆ خێزان و كەسوكارێن وێ نە بۆ وەلاتێن داخوازا دیاركرن چارەنڤیسێ وێ دكەن، لەورا دبێژم ئەو خانما رۆژنامەڤان دێ بیتە بۆمبەكا دی یا تەقیتكری بۆ ژناڤچوونا دستهەلاتا ئیراقێ چ دوور یان نێزیك، هەكە نەهێتە ئازادكرن.
