ئەز بەرهەمێن خۆ ژ جەرگێ چیایێن كوردستانێ بدەستڤە دئینم
بێوار حەمدی:
ئیمان كارێ دروستكرنا بەرهەمێن پاقژكرنێ دكەت و دەرچوویا بەشێ زانستێن كێمیایێ یە و دبێژیت: هەموو وان بەرهەمێن ئەز بۆ كارێ خۆ بكاردئینم د سرووشتی نە و ئەز ژ جەرگێ چیایێن كوردستانێ بدەستڤەدئینم و ب كاردئینم.
ئیمان مەهدی كچەكا گەنجە و دەرچوویا بەشێ زانستێن كیمیایێ یە، د دیدارەكێ دا بۆ ڕۆژناما ئەڤرۆ گۆت: كارێ من دروستكرنا بەرهەمێن پاقژكرنێ یە ب گشتی و د نوكە دا ئەز كار ل سەر دروستكرنا سابینێن سروشتی و كرێم و شامپۆ و سیروما دكەم ژ بۆ ئاریشێن گشتی یێن پرچ وەریانێ و كەڤشكی و بەرهەمێن سروشتی و گۆت (ڤان بەرهەمان ئەز بۆ كارێن خۆ یێن رۆژانە بكاردئینم و ئەز وان بەرهەمان ژ جەرگێ چیایێن كوردستانێ ب دەستڤەدئینم و ب كاردئینم).
ئیمانێ گۆت ژی: هەر ژ زارۆكینیێ خودایێ مەزن ئەز ب خەلاتێ زمانگرتنێ خەلاتكرم و جیاوازكرم ژ كەسێن نورمال، لەوما ژی ئاستەنگێن بێ هیڤیبوونێ و رێگری كرن ژ خواندنێ ژلایێ جڤاكی بەرامبەری من هاتنەكرن و گۆت (من ب سەركەفتیانە و ب ئیرادەیەكا مەزن خۆ بەرپرسیار دیت ژ زانستێ و من شیا كونمرا 95.6 بدەسڤە بینم و بەرەڤ زانستێن كیمیایی چووم، ژ بەر كو ئەو خەونا من یا زارۆكینیێ بوو، ژ بەر هندێ ژی من شیانێن خۆ هەموو د وارێ دروستكرنا بەرهەمێن پاقژكرنێ دا دیت و ب ڤێ ڕێكێ من شیا خزمەتا مروڤایەتیێ بكەم).
د بەردەوامیا ئاخفتنا خۆدا ئیمانێ گۆت: دەمێ ل دەستپێكێ من پەیوەندی ب كومپانیا دروستكرنا بەرهەمێن پاقژكرنێ كری، پشتی من 16 جاران داخوازی ژێكری ژ نوو ئەز قەبوولكرم، ئەڤە ژی هەموو ژبەر كێم شیانیا من یێن زمانی بوو، ژ بەر هندێ ژی بلا چو جاران چ تشت ژ ئارمانجا مرۆڤی مەزنتر نەبن، بێگۆمان ئەگەر دێ د زۆربن، بەلێ كەسێن خودان ئارمانج سەركەفتنێ ل سەر هەر ڕێگریەكێ دئینن.
ئیمانێ ئەو چەندە ژی دا زانین، ب گشتی كاركرنا كچێ ل كوردستانێ یا لاوازە و ب تایبەت د بازاری دا یا كێمە، بەلێ ئەڤ پێنگاڤا كارێ ئونڵاین و سوشیالێ یا خراب نینە كو ببیتە دەرگەهەك كچ ژی بشێت خزمەتێ بكەت و گۆت: (هەردەم دێ بێژم بخوینن و خواندەڤانێن بهێزبن، چونكو خواندن هەر وەكی نانی و ئاڤێ یا گرنگە بۆ ژیانا مرۆڤی، فێرببن حەز ژ خۆ بكەن، ژ بەر كۆ ئەگەر هەوە حەز ژ خۆ كر، ئەڤە هەوە حەز ژ خێزان و جڤاك و كوردستانا خۆ ژی كر.
