ئەز دخوازم کارەکی ھونەری و ب ئاوایەكی ئەكادیمی پێشكێش بكم لێ من دەرفەت و ئیمكانیات كێمن
بەرھەڤكرن:
بەشیر بۆتانی/ دھۆك
ئەڤ ھونەرمەندە خودان دەنگەكی گەرم و نەرم و زەلالە یێ كو ب دەھان سترانێن رەنگین تۆماركرنە و ل سۆشیال میدیایێ بەلاڤ كرنە. ھەر ھۆسان ئەوی بەحسا دەستپێكرنا خوە یا ھونەری كر و گۆت:
من د سالا 1990ی دا دەست ب ژەنینا تەنبوورێ کر، ئەز ژ بابێ خوە فێربووم و من د سالا 1994ێ دا موزیك ل سەر ئاموورا عوودێ ل پەیمانگەھا موزیكی یا حەلەبێ خوەند. ھنگێ من زانی کو موزیكا عەرەبی و کوردی ژ ھەڤدو جودا یە، ژ بەر كو ئەز فێری موزیكا عەرەبی بووم و من گەلەك پارچێن موزیکا عەرەبی ژی دژەنین… موزیكا گەلێن رۆژهەلاتا ناڤین رۆژهەلاتی یە و راستە كو نێزیکی ھەڤدویە لێ دەربارێ هەستان ژ ھەڤدو پڕ جودایە.
ھونەرمەندێ ناڤبری بەرێ بێهتر ل سەر سترانێن زارۆ و مەزنان رادوەستا و گۆت:
من گەلەك سترانێن زارۆیان دانانە، ژ بەر كو سترانێن زارۆیان ل با مە كێمن و ئەڤ رەنگێ سترانان ژ بۆ فێربوونا زمانێ كوردی پڕ گرنگە، داكو زارۆ ژ كولتوورا خوە ژی حەز بكت… ئەز بخوە پڕ ژ ھەلبەستێن كلاسیكی حەز دكم وەك مەلایێ جزیری، مەلایێ باتەیی، فەقیێ تەیران و گەلەكێن دی و من ژ بەر ڤێ حەزكرنا ھەلبەستێن كلاسیكی ھندەك ژ ھەلبەستێن خوە ب ئاوایەكی كلاسیكی ژی نڤیسین.
ھەژی گۆتنێ یە كو ھونەرمەند شێرزاد عەفرینی پڕ ب بابەتێ حەیرانۆكێن دەڤەرا بۆتان داخبار بوویە و خوەستنا وی ئەوە كو حەیرانۆك و پەستەیێن وان ب ئاوایەكی كلاسیكی تۆمار بكت، ئێدی من و ئەو وەسان سترانا (وارێ بەدلیسێ) شرۆڤە كریە كو چاوان تێتە ژەنین و خوەندن یا كو ژ كۆمكرنا سەبری بۆتانی یە.
یەك: حەیرانۆك ب دۆلابەكێ (پێشەكی، ئینترۆ) دەستپێ دكت، دۆلاب ژی ئاوازەكا كورتە و درێژ ژی ھەیە.
دو: پاشێ سەرھەوایەكی (تەقسیمەكی) تێتە ژەنین و حەیرانۆكەك تێتە خوەندن یان بێهتر.
سێ: پەستەیا حەیرانۆكێ تێتە خوەندن و ستران ھەو دبت.
ل سەر تۆماركرنا سترانان ب ئاوایەكی ئەكادیمی و پرۆژا پێشەرۆژێ ھونەرمەند شێرزاد ھۆسان گۆت:
بێگومان ئەز دخوازم کارەکی ھونەری و ب ئاوایەكی ئەكادیمی پێشكێش بكم لێ مخابنە كو من دەرفەت و ئیمكانیات كێمن و ھەژی گۆتنێ یە كو من نوھۆ برۆژەیەك هەیە ئەو ژی تۆماركرنا سێ سترانانە و د داویێ دا ل سەر ڤێ دیدارێ سوپاسیا رۆژناما ئەڤرۆ دكم.
