ئەز دوور نەكەفتیمە و پێنج سترانێن نوو ل بەر دەستن
سندس سالح سلێڤانەیی:
سترانبێژ (كۆڤان ئامێدی) د دیدارەكێ دا بۆ رۆژناما ئەڤرۆ دیاركر كو ئەو ب چو رەنگان ژ سترانگۆتنێ دوور نە كەفتیە و بەردەوام دچیتە ئاهەنگ و شەڤبێریان، هەروەسا پێنج سترانێن نوو بۆ تۆماركرنێ ل بەردەستن، سێ ژوان سترانان پەیڤ و ئاوازێن (عەگید عادل ئامێدی) نە و دو یێن دی ژی ژ پەیڤ و ئاوازێن (هشیار سپینداری) نە.
ناڤبری گۆت: پشتی هاتنا نەخۆشیا كۆرۆنایێ و قەیرانا دارایی و گیرۆبوونا مۆچەی كو كارتێكرن ل هەر تاكەكێ جڤاكی كر و ئەڤە ژی بوو ئەگەر كو د چەند سالێن بۆری دا ئەم نەشیانە چو بەرهەمێن دی تۆماربكەین، چنكو دڤێت پارێ خوە یێ مۆچەی یان ل خێزانا خوە ب مەزێخی یان ژی سترانان پێ تۆماربكەین و هەلبەت دڤی دەمی دا خێزان گرنگترە، لێ هەر دەمێ پشتەڤانی هەبوون یان سپۆنسەرەك هەبوو ل وی دەمی مە سترانێن نوو یێن هەین.
كۆڤان ئامێدی، ل سالا 1983 دەست ب سترانگۆتنێ كریە، ل سالا 1994 كاسێتا ئێكێ یا سترانان و ل 1995 كاسێتا دویێ بەلاڤكرینە و پتری 13 كلیپان هەنە.
