ئەز شیام دەرگەهی بۆ گەلەك كچێن دی ڤەكەم
سندس سالح سلێڤانەیی:
مەدیاكار (دێژین شكری) د دیدارەكێ دا بۆ رۆژنامەیا ئەڤرۆ گۆت: دەمێ ئەز قوتابی ل قوناغا ئامادەیی من گەلەك حەز ل سەر كارێ راگەهاندنێ هەبوو، لێ دایكا من حەزدكر بچمە كولیژەكا ساخلەمیێ، لەورا ئەز ل دووف حەزا وێ چووم و راگەهاندن ژ مێشكێ خوە ئینا دەرێ و ئەز بوومە یا ئێكێ ل سەر ئاستێ قوتابخانا خوە و من باوەرنامەیا بەكالۆریۆس ل پشكا بەنج و چاڤێریا چڕ وەرگرت، لێ رۆژەكێ من دەلیڤەیا كارێ بێژەریێ بۆ مەدیایەكا سەر ب ساخلەمیێ ڤە دیت ل ناڤ سۆشیال مەدیایێ و ئەڤە بۆ كارێ من یێ ئێكێ و بۆ دەمێ سالەك و سێ هەیڤان من بەرنامەیەك دبۆارێ ساخلەمیێ دا پێشكێش دكر، بۆ هەیڤا رەمەزانێ ژی رۆژانە بابەتەكێ ساخلەمیێ بەلاڤ دكەم.
هەروەسا گۆت: ل دەستپێكێ هندەك ئاستەنگ هەبوون و گەلەكا كەسان دگۆتنە من تۆ خودانا باوەرنامەیەكا باشی چاوا ڤی كاری دكەی، لێ ئەز یا بەردەوام بووم و من شیا دەرگەهی بۆ گەلەك كچێن دی ڤەكەم كو ئەو ژی خودان باوەرنامەیێن باشن و بهێن دناڤ راگەهاندنێ دا كاربكەن و هەر بەرنامەیەكێ من پێشكێشكری بۆ من تاما خوە هەبوویە، چنكو ئارامانجا من یا سەرەكی ئەوە راگەهاندنا ساخلەمیێ ل دەڤەرا بەهدینان پتر بەر پێشڤە ببەین، بۆ دەمێ بهێت ژی من پلان و پرۆژەیێن باش هەنە، لێ هەر هزرەك هەتا دبیتە كەتوار پێدڤی ب دەمی و پشتەڤانیێ یە.
