ئەز و مۆزیک دو هەڤالێن بێ بەرژەوەندین
بێوار حەمدی:
سترانبێژ «رامان عوبەید» ددیدارەکێ دا بۆ رۆژناما ئەڤرۆ دیارکر کو کارێ هونەری بتنێ بۆ من وەکو حەزەک و بەهرەیەکا خودایی یە، ژ بەر ڤێ چەندێ دشێم بێژم کو ئەز و مۆزیک وەکو دوو هەڤاڵێن بێ بەرژەوەندی نە دگەل ئێک.
ناڤهاتی گۆت: ستران بتنێ بۆ من پترە ژ هندێ کو بتنێ ئاواز و دەنگ بیت، ئەوا گرنگ و بدلێ منە یا دشێم ب ڕێیا دەنگی بدەرێخم، هەر سترانەک تشتەکی ل من دیاردکەت هەست و هزر و ئارەزو خەونێن من هەمی ئەو تشتێن کو نەشێم ب پەیڤ و رستەیان دیاربکەم ئەز دشێم د سترانێ دا دیاربکەم و پەیوەندیەکا راست دروست بکەم دگەل حەز ژێکەر و گۆهدارێن دەنگێ خوە.
سترانبێژ رامان عوبەید دبەردەوامیا ئاخفتنا خوە دا دیار کر کو ژبلی کارێ هونەری ئەز کارێن تایبەت ژی دکەم و من بازرگانیا خوە یا تایبەت هەیە و ئەز دبینم کو کارێ هونەری بتنێ بۆ من حەزەک و بەهرەیەکا خوداییە لەوما نەشێم بێژم کو ب کارێ هونەری بتنێ دشێم ژیانا خوە بڕێڤە ببەم، بتنێ دشێم بێژم ئەز و مۆزیک وەکو دوو هەڤاڵاینە بێ بەرژەوەندی دگەل ئێکو دوینە نە بۆ بەرژەوەندیێن کەسی یە.
ناڤهاتی گۆت: من رێز بۆ هەموو سترانبێژان هەیە، لێ ئەز بەرزەبوونا هندەک هونەرمەندان بۆ دوو ئەگەران دزڤڕینم، یا ئێکێ ژ بەر شیانێن ماددی یە کو مەزاختنەکا زێدە ل بەرهەمان دچیت، یا دووێ ئەز بۆ بێ پلانیێ دزڤڕینم ژ بەرکو سترانگۆتن نەبتنێ دەنگە بەلکو دڤێت تە هەلبژارتنەکا باش هەبیت و ستایلێ خوە یێ جیاواز هەبیت و گۆت: بۆ داهاتی ژی من چەندین بەرهەم ئامادەکرینە و دپلان دایە کو چەندین بەرهەم ب زمانێن جیاواز بهێنە دروستکرن و سترانێن دوێت دگەل چەندین هونەرمەندێن بیانی بهێنە گۆتن.
