ئەز و یاسایێن خوە
ئیمان یاسین بامەرنی
ب ڤیان ل بەر خۆدیكێ دڕاوەستم ب ڤیان بەرێ خوە ددەمە خوە، ب ڤیان داڤێن پرچا خوە شەدكەم هێدی هێدی دا ئێشانێ نە بینم، ل خوە دنێرم كەزیان بۆ خوە دڤەهینم، حەزدكەم جوانترین جل ل بەر بكەم، ل تۆرێن جڤاكی دەمێ وێنەیەكێ خوە ددانم وان سترانان ددانم یێن پەسنێ دكەن وەكی (خۆ نازداركە هەمی جوانی یا لدەف تە..) بۆ چەند جارەكا ل وێنەیێن خوە دزڤرم دبیت هەر وێنەیەك بشێت جهێ كەسەكێ زیندی ل نك من تژی بكەت.
دێ بەحسا خوە كەم، من گۆت دێ بەحسا خوە كەم، ما چێنابیت؟ ما چێنابیت ڤیانێ ژخوە ڕاكەم! ما چێنابیت دەمی بۆ خوە تەرخان بكەم ! ما چێنابیت جوانترین كەزی ب خوە بڤەهینم! ما چێنابیت سەمایێ دگەل خوە بكەم ! ئەگەر هات و بەرسڤ نەخێربیت ب یا تە ناكەم هێش ناخێ تە زارۆكەك بێ ڤیانە، دڤێت ناخێ من ب بهاترینا من بیت..
ئەگەر ژی بەرسڤ بەلێ بیت، وەرە وەرە دا بۆ تە بەحسا خوە بكەم، بەحسا وێ ڕوژێ بكەم یا من تێدا بڕیاردای ژ بۆ هەتا هەتایێ ڤیانێ ژ خوە ڕاكەم ، بۆ تە بەحسا وێ رێزگرتنێ بكەم یا ل خوە دگرم؟! یان ژی هندەك كوپلان ژ نڤیسانێن خوە یێن كەڤن بۆ تە بداڕێژم، ئەوێن تێدا ئەز بابەتێ سەرەكی؟! نەخێر ئەز بێژم دێ بەحسا یاسایێن خوە كەم بەحسا وان یاسایا یێن بۆ ئێكەم جارە مێشكێ تە شڕۆڤەكرنێ بۆ بكەت، بەحسا وان تشتان ناكەم یێن تایبەت، دێ زوور تشتا دانمە بەرامبەر تە بەلێ نە هەمیان ژبەركو ئەڤەژی بەشەكە ژ یاسایێن منە.
ئۆف.. ب ڕاستی یا باش بوو من خامە هەلگرتی، خوین پتر دناڤ لەشێ من گەڕیا، دێ خامەیێ خوە دانم و ڕاوەستم دا تبلێن من ماندی نەبن، دێ چم هەوایەك تێر ئوكسجین هەلكێشم دگەل هندێ هەر دەستەكێ من ملێ من یێ دی ب ڤەمالیت، تا نوكە دڤێ نڤیسانێ دا یا هەمی ڕاستیێن ڤەشارتی پێشچاڤ دكەم دێهـی دا بهانا ژی دیاربكەم.. یا ڕاست ماندی نەبوویمە و ماندی نابم ل دۆر بەحسكرن ل خوە بدرێژاهیا پەرتووكان، ئوكسجین یێ ژ هەست كرن ب ئارامیێ بۆ من دهێت، ئارامی یا ژ سەمایا خامەی دگەل پەیڤێن دەربارەی من دهێتە هەستپێكرن یا هەست ب دلخوەشیێ دكەم ل سەر هەر پەیڤەكا دەربارەی من، هەروەكی هەر پەیڤەكێ دەهـ سالێن دی ل ژیێ من زێدەكرن، بەلێ بهانە گرتن مەرەم پێ ڕاوەستاندنا بەحسكرن ل خوەیە، ژبەركو یاسایێن من ڕێكێ نادەن زێدەتر دەربارەی خوە درێژبكەم ، هەروەسان دبیت تو (خوێندەڤان) نوكە ئەڤێ كەسایەتیا نورمال ب تێكچوونا كەسایەتیا (ئەزووكی) بەراوردبكەی بەلێ دبنیات دا ژئێك جودانە .
