ئەز یا ل ئەمریكا و دلێ من یێ ل دهۆكێ
شاكر ئەتروشی:
جیهان رەشید بریفكی، خانمەكا خەلكا دهۆكێ یە، پتری سیهـ سالانە ل ویلایەتا (Moorhead, Minnesota) ل وەلاتێ ئەمریكا دژیت، ئەڤ خانمە شیایە د چەند سالێن بۆری دا ب هاریكاریا چەندین خێرخوازان ژ دەرڤەی وەلاتی گۆژمەكێ زۆرێ پارەی كۆمبكەن و هەتا نوكە شیاینە هەشت خانیان بۆ خێزانێن هەژار ل دهۆكێ بكڕن، هەروەسا هاریكاریا چەندین نەخۆشان ژی كریە.
جیهانێ بۆ رۆژنامەیا ئەڤرۆ گۆت: وەك كارێ فەرمی ئەز وەك وەرگێڕا زمانێ كوردی و ئنگلیزی ل ئەمریكا كاردكەم، هەروەسا ئەز دچمە هندەك جها سمیناران ل دۆر رۆل و پێگەهێ كوردان پێشكێش دكەم و گەلەك ژوی خەلكێ دهاتنە سمینارێن مە د گۆتنە من پشتی سمیناراتە ئێدی مە باشتر كورد نیاسین، دەربارەی كارێ خێرخوازی ژی وەك ژنەكا خەلكا دهۆكێ من دڤیا ئەز هاریكاریا باژێرێ خوە بكەم، ب تایبەت ژی تەخا هەژاران، لەورا ب هاریكاریا چەند خێرخوزان ژدەرڤەی وەلاتی مە رێكخراوەكا بچووك دانەایە و پارە لێ دهێنە كۆمكرن و ئەم دئینمە دهۆكێ دگەهینە خێزان و كەسێن پێدڤی و دووماهی سەرەدانا من ژی بەری سالەكێ ئەز هاتبوومە دهۆكێ و من گۆژمێ (120) هزار دۆلاران دگەل خوە ئینا بوون و ئەم شیاین شوقەیەكێ بۆ خێزانەكێ بكڕین كو شەش ئەندامێن مالێ خودان پێدڤیێن تایبەت بوون، بۆ دەمێ بهێت ژی دێ د بەردەوام بین ل سەر گەهاندنا هاریكاریان بۆ خێزانێن پێدڤی، هەروەسا مە پرۆژەك بۆ پاراستنا ژینگەهێ ژی ل بەر دەستە و من دڤێت بێژم كو راستە ئەز ل ئەمریكا دژیم لێ دلێ من هەردەم یێ ل دهۆكێ.
