ئەز
زنار تۆڤی
ئەز، نە هەلبەستڤانم
داكو بشێم ب پەیڤێن خۆ
تەڤنێ ئەشقەكا نوو بۆ تە برێسم.
ئەز، نە پەیكەرسازم
داكو بشێم پەیكەرێ جوانیێ
ل بەر بەژنا تە دروست بكەم.
ئەز، نە بلۆرڤانم
داكو بشێم ئاوازێن ئەشقێ
ل هەموو سپێدە و ئێڤاران بۆ تە بلۆرینم.
ئەز، نە نۆژدارم
داكو بشێم، خوینا خۆ ل گەل یا تە تێكەل بكەم و
هەردەم دناڤ دەمارێن تە دا بژیم.
ئەز، نە بارانم
داكو بشێم، وەكی خوناڤێ ل تە ببارم و
هەردو رویكێن تە ب رامووسم.
ئەز، نە شەڤم
داكو بشێم، هەیڤا چاردە شەڤی
پێشكێشی دێمێ تە بكەم.
بەلێ ئەز…
خۆدان دلەكێ پرم ژ تە و
چ جاران نەشێم دووری تە بژیم و
هەردەم ژ بۆ هاتنا تە یێ ب ژڤانم.
