ئەكتەری و سترانگۆتن بۆ من وەكو ئێكن
زنار تۆڤی:
گونول دیلان، سترانبێژەكا باكۆرێ كوردستانێ یە، ل سالا 1991 ێ ل باژێرێ ئامەدێ ژ دایكبوویە، ل گەل هندێ كارێ ئەكتەرییێ ژی دكەت، د دیدارەكێ دا بۆ رۆژناما ئەڤرۆ دبێژیت: ل چەند رۆژێن بۆری من سترانەكا نوو ب ناڤێ (چ رۆژێن خۆشن بوو) بەلاڤكریە، پەیڤ و ئاواز یێن رەمەزان كۆچ بوون، من ل مالا خۆ ل باژێرێ ئیستانبولێ كلیپ كریە و كۆمەكا هەڤالێن من پشكداری تێدا كرینە و نوكە كاری ل سەر تۆماركرنا سێ سترانێن دی دكەم و من ل بەرە وانژی كلیپ بكەم و هەتا نوكە من(22) كلیپ و سێ ئەلۆمێن سترانان و (11) سترانێن سینگل بەلاڤ كرینە.
ناڤهاتیێ گۆت: ژبلی سترانگۆتنێ هەتا نوكە من پشكداری د (95) زنجیرێن درامایی دا كرینە، هەروەسا پشكداری د دو فلمێن سینەمایی و د دراما (ژان) دا كرینە ومن رۆلێ سەرەكی تێدا گێرایە، خەلكێ گەلەك حەز ژ وێ درامایێ دكر، دیسان من پشكداری د دراما (هیڤی) دا كریە و ئەز وەكو ئێك حەزژ سترانگۆتنێ و درامایێ دكەم، هەردو كار ژی وەكو زارۆیەكێ نە بۆ من و گەلەك حەز ژ هەردویان دكەم و من ل بەرە ب ڤان كاران هەردەم خزمەتا هونەر و كلتۆر و درامایا كوردی بكەم، هەروەسا ل گەل گۆتنا سترانان ئەز ئامیرێ سازێ ژی دژەنم.
