ئەكتەرەكا دهۆكێ دێ رۆلێ سەرەكی د فلمێ (ساتێك بە چاوەڕوانی) دا گێڕیت
شاكر ئەتروشی:
سینەماكار(مەجید دەروێش) كو خەلكێ پارێزگەها ئۆرمیێ یە ل رۆژهەلاتێ كوردستانێ، د دیدارەكێ دا بۆ رۆژناما ئەڤرۆ گۆت: بەری چەند رۆژان من سیناریۆیا فلمێ خوە یێ دویێ ئەوێ ل ژێر ناڤێ (ساتێك بە چاوەڕوانی) ب دووماهی ئینا و ل چەند رۆژێن بهێن ل گوندەكێ سەر ب پارێزگەها ئۆرمیێ ڤە دێ هێتە وێنەكرن، ناڤەرۆكا ڤی فلمێ سینەمای ل دۆر كچەكێ یە كو ب زۆری د دەنە شوو، ئەڤە دیاردە هەتا نوكە ل رۆژهەلاتێ كوردستانێ مایە، پشتی بۆرینا دەمەكێ كێم ئەو كچ تووشی گەلەك ئاستەنگ و نەخۆشیان دبیت لەورا خوە دسۆژیت و دمریت، ئێدی دایكا وێ ژی ژ قەهرێن وێ دا دین دبیت، چەند ئەكتەر دێ دڤی فلمی دا پشكداربن، لێ یا سەرەكێ دێ ژ پارێزگەها دهۆكێ بیت و نوكە ئەم یێ دانوستاندنێ دگەل دكەین، پشتی گرێبەستا كاری دهێتە ئیمزاكرن ژنوو دێ شێین ناڤێ وێ ئاشكراكەین و مە ل بەرە د ماوێ پێنجی رۆژان دا وێنەكرن ب دووماهی بهێت، دووڤدا دێ بەینە ڤیستەڤالان پاشان دێ ئینە پارێزگەها دهۆكێ ژی نیشادەین.
ناڤبری بەری دو سالان فلمێ خوە یێ ئێكێ ب ناڤێ (سیبەر) چێكربوو، وی فلمی پشكداری د چەندین فیستەڤالێن سینەمای یێن جیهانی دا كریە و چەندین خەلات وەرگرتینە، ژوانا خەلاتێ باشترین دەرهێنەر ل فیستەڤالا بەرازیل و نوكە ژی بەربژارە بۆ وەرگرتنا چەند خەلاتێن دی.
