ئەكتەر و دەرهێنەرێن مە د دلسۆزن
سولین سلێمان:
سەمیعە مەحموود، كو ب (سەمیعە هەلەبجەیی) دهێتە نیاسین، ئەكتەرەكا بەرنیاسە، ژدایكبوویا سالا (1971) یە، د دیدارەكێ دا بۆ رۆژناما ئەڤرۆ دبێژیت: حەزا من بۆ كارێ هونەری یا كەڤنە و كارێ ئەكتەریێ گەلەك تشت بۆ من كرینە، یا ژ هەموویێ گرنگتر رێزگرتنا خەلكەكی یە بۆ كارێ مە، لەورا ئەز هەست ب دلخۆشیەكا مەزن دكەم و ب كارێ خوە یا سەرفەرازم.
هەروەسا گۆت: كارێ ئێكێ من پشكداری تێدا كری شانۆگەریا (جگەر گۆشەكان) بوو كو ل سالا 1982 هاتبوو نیشادان، پشتی مە پێشكێشكری مال و هندەك هەڤالان ئەز هاندام كو یا بەردەوامبم، لەورا هەتا نوكە من پشكداری د چەندین شانۆگەری و فلم و درامایان دا كریە، ژوانا (گەردەلۆل، سایە، سەراب، سەمای تەرزە) و گەلەكێن دی و هەر چەندە نوكە چو پشتەڤانی ل كارێن هونەری ناهێتە كرن، لێ ب دیتنا من نوكە فلم و درامایێن كوردی د ئاستەكێ باش دانە، ئەو ژی ژ دلسۆزیا ئەكتەر و دەرهێنەرێن مەیە و هیڤیا من ژ وەزارەتا رەوشەنبیری و حكومەتا هەرێمێ ئەوە پتر پشتەڤانیێ ل كارێن هونەری بكەن، ب تایبەت ژی فلمێن سینەمایی، چنكو ئەو بۆ وەلاتێ مە گەلەك د گرنگن.