ئەلبۆما (دەنگێ دلی) دێ بەلاڤكەت
زنار تۆڤی:
هونەرمەند (گارە سازگار) كو خەلكێ باژێرێ دهۆكێ یە و ئەڤە چەندین سالە ل وەلاتێ دانیمارك دژیت، د دیدارەكێ دا بۆ رۆژناما ئەڤرۆ دیاركر كو وی ئەلبۆمەكا نوو ب ناڤێ( دەنگێ دل) تۆماركریە، ژ حەفت سترانان پێك دهێت، دەرهێنانا مۆزیكێ و كارێ میكس و ماسترینگێ ژلایێ تانژۆ دۆمان ڤە هاتیەكرن، ژەنینا تەمبۆرێ ژ لایێ كەنان چالی و ئەركان چاناكچی ڤە هاتیە كرن، د هەمان دەمدا ئامیرێن دیتر یێن موزیكێ ( بلۆر و دۆدك و كەمان و گیتار و باس) دناڤ بەرهەمێ وی دا هاتینە ب كارئینان و مۆزیكژەنێن پرۆفیشنال ژ ئیستەنبۆلێ و ئەنقەرە و ئیزمیرێ هەموو ب شێوێ زیندی ب كارئینایە
هەروەسا گۆت: ژ وان حەفت سترانان دو ستران كلیپ كرینە، كارێ دەرهێنانا كلیپان ژی ژ لایێ تانژۆ دۆمان ڤە هاتیەكرن، كلیپ ب رەنگەكێ جوان و بالكێش هاتینە چێكرن، ئەڤە نێزیكی سێ سالان بوو من كار ل سەر ڤی بەرهەمێ نوو دكر، ئەز دخوازم ئەڤ بەرهەمێ من یێ نوو ب دلێ حەز ژێكەرێن سترانا كوردی یا رەسەن بن، هەروەسا هەتا نوكە من چەندین ئەلبۆمێن سترانان و كلیپ و سترانێن سینگل ژی بەلاڤكرینە و حەزا من ئەوە سترانێن من گۆتین و ئەوێن من داینە گەلەك هونەرمەندان هەموو بكەمە پرتووك.
