ئەلمانیا: دێ چەکێ پێشکەفتی دەینە ئۆکرانیایێ
وەزارەتا بەرگریێ یا ئۆکرانیایێ راگەهاند، هەکە وەلاتێن ئێکەتیا ئۆرۆپا و ئەندامێن ناتۆ چەکێ پێشکەفتی و سیستەمێ بەرگریا مۆشەکی نەدەنە وان ئەو نەشێن ل هەمبەر ئێرشێن دژوار یێن رۆسیا بەرگریێ بکەن و ئەو یەک دێ هەڤسەنگیا شەڕی د بەرژەوەندیا رۆسیا دا گوهۆڕیت و دڤێت وەلاتێن ئەندامێن ناتۆ و یێن ئێکەتیا ئۆرۆپا زێدەتر پشتەڤانیا ئۆکرانیایێ بکەن.
پشتی داخۆیانیا وەزارەتا بەرگریێ یا ئۆکرانیایێ، دوهی وەزارەتا بەرگریێ یا ئەلمانیا ژی راگەهاند، وان بریار داینە سیستەمێ بەرگریێ یێ موشەکی و چەکێ پێشکەفتی بدەنە ئۆکرانیایێ و دڤێت وەلاتێن دی یێن جیهانێ ب تایبەتی ژی وەلاتێن ئەندامێن ناتۆ پتر هاریکاریا ئۆکرانیایێ بکەن، دڤێت رێ نەدەین رۆسیا د شەڕی دا سەرکەڤیت، سەرکەفتنا رۆسیا دێ بیتە دەستپێکرنا قۆناغەکا نوو و مەترسیدار بۆ هەموو ئۆرۆپا، ژ بەر ڤێ یەکێ ژی دڤێت هەموو وەلاتێن ئەندامێن ناتۆ ب تایبەتی ژی وەلاتێن ئێکەتیا ئۆرۆپا ب هەموو شیانێن خوە هاریکاریا ئۆکرانیایێ بکەن.
