ئەلمانیا پەیوەندیێن خوە ل گەل تورکیا سنۆردار دکەت
ئەڤرۆ نيوز:
حوکمەتا ئەلمانیا راگەھاند کو ئەو وەکو بەرێ پشتەڤانیێ ل کۆمپانیێن خوە ل تورکیا ناکەین و ئەو پارێ وەکو بەرێ بۆ ھاریکاریێ ھاتبوو تەرخانکرن دێ ھێتە راگرتن و داخواز ژ وەلاتیێن خوە ل تورکیا ژی کر کو ژ بەر رەوشا ئالۆز یا ئێمناھیێ زێدە سەرەدانا تورکیا نەکەن.
ئاژانسا دویچە یا ئەلمانیا ژی راگەھاند کو بارێ ئابووری یێ تورکیا خراب دبیت و ژ بەر ھندێ ژی حوکمەتا ئەلمانیا ئێدی ناخوازیت وەکو جاران ل تورکیا سەرمایەگوزاریێ بکەت و داخواز ژ کۆمپانیێن خوە ژی دکەت کو چالاکیێن خوە ل تورکیا سنۆردار بکەن.
ل ئالیێ دی وەزارەتا دەرڤە یا ئەلمانیا ژی دوھی راگەھاند کو ژ بەر رەوشا ئێمناھیێ ئەم داخواز ژ وەلاتیێن خوە دکەین کو سەرەدانا تورکیا نەکەن و ھەکە کارێن وان یێن پێدڤی نەبن باشترە وەلاتیێن مە یێن نھا ل تورکیا ژی ڤەگەرنە ڤە ئەلمانیا.
چاڤدێرێن سیاسی ژی دیار دکەن کو پشتی ئەردۆگان وەکو سەرۆک کۆمارێ تورکیا دەست ب کاری کری لیرێ تورکیا ل ھەمبەر پارێ بیانێ رۆژ ب رۆژێ بھایێ خوە ژ دەست ددەت و ئەلمانیا ژی ناخوازیت ژ بەر رەوشا خراب یا ئابووری کۆمپانیێن وێ تووشی زیانێ ببن و ژ بەر ھندێ ژی دخوازیت پەیوەندیێن خوە یێن ئابووری ل گەل تورکیا سنۆردار بکەت.
