ئەلندا بەرزەبوویی
ئارین عیسا عبدولڕەحمان
ئێڤارەکا پاییزێ یا درەنگە، خولکێ ئەسمانی وەکی دێمی من یێ کەفتی، گێلەشۆکا ئەڤێ ئێڤاری ئەز کەڕکربووم. هەر کەس بەرەڤ ڕێکا خوەڤە دچیت، لێ سەرێن ڕێکان ل بەر من د بەرزەنە. ئەزا شەپرزەبوویم و بەردەوام ل ئەزەکا خوە یا بەرزەبووی دگەڕم، لێ جاران مرۆڤ ژ وەستیانێ ژی د وەستییێت، ل دویماهییێ هێز د چۆکێن مندا نەمان و ل بەر لێڤا جاددەیێ ڕوینشتم، بۆ چەندەکێ من چاڤێن خوە گرتن، من هند دیت کچەکا بچویک یا ل بەرانبەری من، کچەکە سەروسیمایێ وێ یێ غەریب نینە هەر وەکی بەری نوکە مە تەمەنەک ل گەل ئێک پاڕڤەکری. گۆتە من: خاتینا زەلال تو دزانی پاشەڕۆژا تە دێ وەکی ناڤێ تە یێ زەلال و دلێ تە یێ پاک بیت! ئەڤجا خەما نەخۆ و بەردەوام بلا چاڤێ تە ل دلۆڤانییا خودایی بیت، هەر جارەکا ماندی بووی بتنێ سەرێ خوە بلندبکە دێ خودێ دلۆڤانییا خوە ل سەر تە دا بارینیت، ئاسمان دێ ب بەرفرەهییا خوەڤە بۆ تە گڕنژیت، هەر گیانەوەرەکێ ل ئاسمان و ئەردی دێ شەهدەییا باشی و پاکییا تە دن. ژ پەیڤێن وێ مەندەهۆش مام و من گۆتێ: سۆزبیت فریشتەیا ئەسمانی، لێ تو چەوا من دنیاسی.؟ ئەرێ تو کیی و ناڤێ تە چییە؟! بتنێ گڕنژی و گۆتە من: دەما ئەز بچویک بابێ من ئەز نازداردکرم و دگۆتە من ئەلندا من. ئەلندا من! ئەز دناڤ بیرهاتنێن خوە یێن زارۆکینییێدا نقۆبووم، لێ ژ نشکەکێڤە دلۆپەکا بارانێ کەڤتە سەر ڕوویێ من و ئەز هشیارکرم، من دیت ڕەنگێن شین، پڕتەقالی و زەر یێن مێهڤانی جوانییا ئاسمانی بووین و بیرهاتنان ل گەل ئێک ساخ دکن و پاش عەوران جڤاتا ئەوان تێکدا و ڕۆندک ب ڕوویێ ئەسمانیدا هاتنە خوار و کەڤتنە ل سەر ڕوویێ مرۆڤان و چەندین کەس ژ خەم و ژانێن خوە ڤەڕەڤین و ب سایا ئەوان ڕۆندکان خوەشی گێڕان، ل گەل کەفتنا هەر دلۆپەکا بارانێ من هەست ب دلۆڤانی و میهرەبانییا خودای کر، من هەولددان ب دەستێن خوە دلۆڤانییا خودایی کۆم بکم، لێ یا بێی مفابوو، چونکی دلۆڤانییا خودایی جیهانێ هەمییێ ڤەدگریت بێی جوداهی، ئەزەکا بەرزە ل بەر ئەڤێ خوەشیێ گەلەک بچویک بووم و جیهانێ تێرا من نەدکر، دوبارە من هەستپێکر ئەزا ل ژێر سیبەرا دلۆڤانییا خودایی. پاش ژ ناڤ هزران ڤەڕەڤیم و من سەحکرە دۆرێن خوە چ کچین بچویک نینن، من زانی گێلەشۆکا هزران ئەز خاپاندم، لێ دەرمانێ دەردێ من کرە د ناڤ دەستێن مندا. ئەلند و تژی چاڤێن من بوونە ڕۆندک، بیرهاتنێن ئەلندا سپێدەهییان هاتنە بیرا من و من زانی ئەو ئەزا بەرزەبووی یا بەردەوام ئەز لێ دگەڕیایم ئەز بخوە بووم.
