ئەلهۆیێن چیا ب ئاوازێن سەركەفتنێ ژ سلێمانیێ ڤەگەڕیان
تیما تەپا پێی یا یانەیا دهۆك بەردەوامی دا ئەنجامێن خوە یێن باش و شیا سەركەفتنا دویێ بینت ب گۆلەكێ بێ بەرانبەر ل سەر نەورۆز بینت، ژ چارچووڤێ هەڤڕكیێن گەڕا دویێ ژ خولا ستێرێن ئیراقێ یا پیشەكاران ئەوا دوهی ل یاریگەها نەورۆز ل باژێرێ سلێمانیێ هاتیە كرن.
د نیڤا ئێكێ دا هەر ژ دەستپێكا وێ یاریزانێن تیما یانەیا دهۆكێ گڤاشتن ل سەر گۆلا نەورۆز كرن و ئاستەكێ نایاب نیشان دا، گۆلا ئێكێ یا ڤێ نێڤێ پشتی گڤاشتنێن بەردەوام د خولەكا 18ێ ژلایێ پیشەكاری وێ یێ كۆتڤۆاری یانێك زاكێری ڤە هاتییە تۆماركرن ب شیانێن خوە یێن تایبەت، ژلایێ خوەڤە رێوان ئەمین كاپتنێ تیما دهۆكێ ژی د خولەكا 22ێ دا دەلیڤەكا گۆلكرنێ ژ دەستدا، پشتی ڤێ گۆلێ ئاستێ یاریێ بهێزتر لێهات و خودانێن ئەردی بزاڤكرن بۆ راستڤەكرنا ئەنجامێ یاریێ و دو بزاڤێن گۆلكرنێ ژلایێ یاریزانێ وێ محەمەد سامی د خولەكێن 35 و 37 هەبوون لێ هێلا بەرگێرییا دهۆكێ شیا رێگریێ لێبگریت، دەمێ مایی یێ یاریێ دگەل هەبوونا هێرشێن هەڤدژ یێن هەردو تیما لێ راهێنەرێ دهۆكێ سلێمان رەمەزان شیا كۆنترۆلا ئەوان فشارێن راهێنەرێ نەورۆز وەلی كەریم بكەت و نیڤا ئێكێ ب پێشكەفتنا تیما خوە بهێلیت.
د نیڤا دویێ دا ئاستێ یاریێ بهێزتر لێهات تایبەت پشتی ئامۆژگاریێن راهێنەرێن هەردو یانەیان بۆ شێوازێ یاریكرنێ، ئێكەم دەلیڤەیا گۆلكرنێ هاتیە ژ دەستدان ژلایێ یاریزانێ دهۆكێ زوئەلفقار د خولەكا 48ێ بوو دەمێ بەرانبەر گۆلێ و بێ گۆلچی نەشیایی مفایی ژ تەپەكا ڤەگەڕیایی وەربگریت، پشتی بۆرینا دو خولەكان یاریزانێ نەورۆز ژی دەلیڤەكا گۆلكرنێ مفا ژێ نە وەرگرت، د خولەكا 63ێ دا دادڤانێ یاریێ محەمەد زەید یاریزانێ دهۆكێ هێران ئازاد ب كارتا سۆر دوورئێخست، دەمێ مایی یێ یاریێ گڤاشتن ژلایێ یاریزانێن نەورۆز ل سەر گۆلا دهۆكێ دهاتنە كرن بەرانبەرا یاریزانێن ئەلهۆیێن چیا سەرەدەرییەكا هەستیاری دگەل یاریێ كر، د خولەكا 88ێ دا دادڤانێ یاریێ پەنەلتیەك بۆ خودانێن ئەردی هەژمارت لێ پشتی سپێرتا خوە ب سیستەمێ ڤارێ كری و پەنەلتی هاتە هەلوەشاندن، ئەنجامێ دووماهیێ تیما دهۆكێ ب ئاوازێن سەركەفتنێ ل باژێرێ رەوشەبیریێ ژەنین و سەركەفتنا دویێ بۆ جەماوەرێ خوە كرە دیاری.
