ئەلهۆیێن چیا ل ئاسمانێ كەنداڤی فڕین و ئێكەم نێچیرا خوە گرت
تیما فوتبۆلا یانەیا دهۆك ئێكەم سەركەفتن د ئێكەم پێنگاڤا خوە یا كۆپا كەنداڤی دا هاڤێژت، پشتی ب سەركەڤتی ل سەر مێڤانا خوە ئەهلی سەنعا یا یەمەنی ب دو گۆلان بێ بەرانبەر، د یارییا واندا ئەوا ل شەڤا دەربازبوویی ژ هەڤڕكیێن كۆما ئێكێ د ناڤ ئەرد و جەماوەرێ ئەلهۆیێن چیا دا هاتییە كرن.
د نیڤا ئێكێ دا یاریزانێن دهۆكێ هەرزوو دەست ب گڤاشتنان كرن و چەندین بزاڤكرن ژبۆ تۆماركرنا گۆلا ئێكێ و پێشكەفتنێ لێ هەموو ئەو بزاڤ بێ ئەنجام بوون، د بەرانبەر دا یاریزانێن یانەیا مێڤان ژی چەند بزاڤەكێن كێم هەبوون لێ ئەنجامێ نیڤا ئێكێ بێ گۆل ب دووماهی هات.
د نیڤا دویێ دا هەر ژ دەستپێكا یاریێ تیما دهۆكێ پلانێن هێرشبەریێ دانان و گڤاشتن ل سەر گۆلا یەمەنی كرن هەتا شیاین گۆلا ئێكێ و پێشكەفتنێ بینن ئەوا ژلایێ پیشەكارێ وێ یێ لوبنانی كەریم دەروێش ڤە د خولەكا 55ێ دا هاتیە تۆمار كرن، پشتی ڤێ گۆلێ یاریزانێن ئەهلی سەنعا لڤینەك پەیدا كر ژبۆ ڕاستڤەكرنا ئەنجامێ یاریێ، ژلایێ خوەڤە ژی راهێنەرێ دهۆكێ داخواز ژ یاریزانێن خوە دكر بەردەوامبن ل سەر هێرشان ئەڤچەندە ژی یا دیاربوو، د خولەكا 90+1 زولفەقار یونس عەبد شیا گۆلا دویێ بۆ تیما خوە دهۆكێ بینیت، یاری ب دو گۆلان بێ بەرانبەر ب دووماهی هاتی.
بۆ زانین هەشت یانە پشكداریێ تێدا دكەن هاتینە بەلاڤكرن ل سەر دو كۆمان، یاریێن وان ب شێوەیێ خول دو قۆناغ دهێنە ئەنجامدان هەتا 25ێ نیسانا سالا 2025ێ بەردەوامبن، هەردو كۆم بڤی شێوەیی نە، كۆما ئێكێ دهۆك، نەسر یا ئیماراتی، زەفار یا عومانی، ئەهلی سەنعا یا یەمەنی، كۆما دویێ: عەرەبی یا قەتەری، ئیتفاق یا سعۆدی، ریفاع یا بەحرێنی، قادسییە یا كوێتی.
تیما یانەیا دهۆك دێ یاریێن مایی بڤی شێوەیی كەت، یارییا دویێ ل دویێ چرییا دویێ یا بهێت بیتە مێڤانا یانەیا زەفار یا عومانی، یارییا سێیێ 27-11- 2024 دێ مێڤاندارییا نەسر یا ئیماراتی كەت، یارییا چارێ كۆ دبیتە قۆناغا دویێ ژ كۆمێ دێ ل 3-12- 2024 بیتە مێڤانا نەسر یا ئیماراتی، یارییا پێنجێ ل 4-2-2024 دێ بەر ب وەلاتێ یەمەن چیت و بیتە مێڤانا یانەیا ئەهلی سەنعا، یارییا پێنجێ و دووماهیێ ژ قۆناغا كۆمان دێ ل 19-2-2024ێ مێڤاندارییا یانەیا زەفار یا عومانی كەت.
