ئەمریكا بۆ حوكمەتا ئیراقێ: حەشدا شەعبی ژ چەك نەكەی دێ هێرشێ كەینە سەر
ئەمریكا دو بژاردە ئێخستینە پێشبەری ئیراقێ، ژ چەككرنا حەشدا شەعبی یان هێرشكرن ل سەر، بەلێ ئیرانێ ڤیتۆ هەیە.
چار ژێدەرێن ئەمنی و سیاسی یێن نێزیك ژ حوكمەتا بەغدایێ، د داخۆیانیێن هەڤشێوەدا، بۆ مالپەرێ (العربی الجدید) ئاشكراكرن، كو ل ڤان دووماهییان پەیاما ئەمریكا هاتە گەهاندن بۆ ئیراقێ سەبارەت ب پێدڤییا ژناڤبرنا چەكێ جۆرەیێی گرۆپێن ئیراقی یێن چەكدار یێن ب سەر حەشدا شەعبیڤە، كو پێك دهێن ژ فرۆكەیێن بێفرۆكەڤان و مووشەكێن ناڤەندی، یان بژاردەیا دویێ كو ژناڤبرنا وانە ب رێكا هێرشێن ئەسمانی.
نێزیكی 10 گرۆپێن چەكداری یێن ئیراقی خودان فرۆكەیێن بێفرۆكەڤانن كو مەودایێ وان دگەهیتە سەدان كیلۆمەتران و چەندین گرۆپێن چەكداری ئەو فرۆكە بۆ هێرشكرنێ ل سەر ئیسرائیلێ بكارئیناین، ژ بلی ب ئارمانجگرتنا بنگەهێن ئەمریكی ل رۆژهەلاتا سووریێ و ئیراقێ.
دیارترین گرۆپێن ئیراقی یێن خودانێن وان چەكان (كەتائیبێن حزبوللا، بزاڤا نوجەبا، كەتائیبێن ئیمام عەلی، كەتائیبێن سەیدولشوهەدا، ئەلبودەلا، ئەنسارولئەوفیا و عەسائیب ئەهلولحەق) كو ئەڤ هەموو ب بەرەیێ موقەوەمێ د بەرنیاسن.
د دەمێ چەند رۆژەكاندا، چار ژێدەرێن ئاگەهدار ل بەغدایێ، ئێك ژوان بەرپرسەكێ بلند یێ ئەمنییە، پێزانین داینە ل دۆر داخوازیێن ئەمریكا ژ ئیراقێ، بۆ ژناڤبرنا چەكێ جۆرەیێ یێ گرۆپێن چەكدار، كو پێك دهێن ژ فرۆكەیێن بێفرۆكەڤان و مووشەكێن مەودا ناڤەند و دوور، كو گەفن ل سەر وەلاتێن دەوربەرێ ئیراقێ ژ وان ئیسرائیل.
ئەندامەكێ جڤاتا نوونەرێن ئیراقێ یێ نێزیك ژ محەمەد شیاع سودانی، سەرۆك وەزیرێن ئیراقێ راگەهاندبوو» ئەمریكا ل پلەیا ئێكێ گرنگیێ ب پرسا فرۆكەیێن بێفرۆكەڤان و مووشەكێن گرۆپێن چەكدار ددەت».
هەروەسا رۆهنكر بوو ژی» داخوازییا نوكە یا ئەمریكا ژ ناڤبرنا وانە، یان دەستەسەركرنا وان ژ ئالیێ حوكمەتا ئیراقێڤە».
وی پەرلەمانتاری، ژ بەر هەستیارییا بابەتی داخواز ژ مالپەرێ (العربی الجدید) كریە ناڤێ وی نەهێتە ئاشكراكرن، دیاركر» پەیامێن ئەمریكا د ڤێ دۆسێیێدا د رۆهنن، ئەو گرنگیێ ب مانا وان گرۆپان ب شێوەیەكێ ناڤخوەیی ل ئیراقێ یان هەتا ئێكگرتنا وان ب كێمێ د قۆناغا نوكە دا نادەن، ئەوا نوكە گرنگ ئاسایشا بنگەهێن ئەمریكییە و ئاسایشا ئیسرائیلێیە، فرۆكەیێن بێفرۆكەڤان و مووشەكێن گرۆپێن ئیراقی یێن چەكدار بابەتێن گەرمێن نوكە نە و گرۆپ رەت دكەن هەتا دانوستاندنێ ل سەر ڤێ دۆسێیێ ل گەل حوكمەتا ئیراقێ بكەن». بەرپرسەكێ ئەمنیێ بلند ل بەغدایێ ئەڤ پێزانینە پشتڕاستكرن و دبێژیت» ئەمریكا چەندین شێوازێن فشارێ د ڤی ئالیدا بكاردئینیت، ژوان ژی كو ئیسرائیل دێ هێرشێ كەتە سەر جهێن فرۆكەیێن بێفرۆكەڤان و مووشەكان د حالەتێ ژناڤ نەبرنێدا، یان هەلنەوەشاندنا وان و ئەوا كو واشنتۆن نەشێت بەردەوام د رێگریكرنێ ل بجهئینانا گەفێن د ناڤ ئاخا ئێراقێدا».
سیاسەتمەدارەك و پەرلەمانتارەكێ بەرێ ژ ژێدەرەكێ نێزیك ژ سەرۆك وەزیرێن ئیراقێ، كۆمەكا داخوازیێن ئەمریكا ڤەگوهاستن، ژ وان ژی ب دووماهئینان ب كارێ رێڤەبەرییا پیشەسازییا سەربازی یا سەر ب حەشدا شەعبیڤە، كو ب كریار چەندین گرۆپێن كاریگەر د مەیدانا ئیراقێدا كۆنترۆل ل سەر كری، هەموو ژی هەڤپەیمانێن ئیرانێ نە، هەروەسا دوماهئینان ب كونترۆلا گرۆپێن ئیراقی ل سەر چەندێن دەڤەران د كو رێگریێ ل زڤرینا ئاكنجیێن وان دكەن و دوبارە زڤراندنا وان دبن دەستهەلاتا دەولەتێڤە وەكو ( جەرف ئەلسەخر، عویسات و عوجە …. هتد).
موهەنەد سەلووم، پسپۆرێ ڤەكۆلینێن ئەمنی دبێژیت» واشنتۆن گرنگییەكا مەزن ب چەككرنا گرۆپێن ئیراقی ددەت، ب تایبەتی پشتی بكارئینانا وی دژی بنگەهێن ئەمریكی ل تەنف و زەڤییا عومەر ل سووریێ، هەروەسا دژی دەڤەرێن ئیلات و حەیفا ل ئیسرائیلێ».
وی ڤەكۆلەری دیاركر» واشنتۆن تنێ ب ڤەكێشانا چەكێ جۆرەیی نا راوەستیت، بەلكو هێدی هێدی دێ بەر ب ب دووماهیئینان ب پێكهاتەیێ سەربازیێ سەربخو یێ ڤان گرۆپان ئینیت و ئارمانج ل ڤێرێ تنێ بێچەككرن نینە، بەلكو دوبارە رێكخستنا سیستەمێ ئەمنیێ ئیراقێیە، ب شێوەیەكی كو تنێ د دەستێ دەولەتێدا بیت و د چارچۆڤەیێ پێكهاتەیەكیدا بیت كو د شیاندا بیت بهێتە چاڤدێریكرن و ژ ئالیێ هەڤپشكێن رۆژئاڤاییڤە راهێنان پێ بهێنە كرن».
