ئەمریكا دووماهی ژڤان دایە سەركردەیێن شیعی بۆ ئێكلاكرنا پرسا پۆستێ سەرۆك وەزیران
ئەمریكا ب ڕێكا بالیۆزخانەیا خوە ل بەغدا، دەلیڤەیا 48 ساتان دایە سەركردەیێن شیعەیێن ئیراقێ یێ د ناڤا چارچۆڤەیێ هەماهەنگیێدا تاكو كەسەكێ دی بۆ بەربژاركرنێ ل شوونا نووری مالكی بۆ پۆستێ سەرۆك وەزیرێن نوو یێ ئیراقێ ئێكلا بكەن.
سەبارەت ڤێ پرسێ ژێدەرەكی ژ چارچۆڤەیێ هەماهەنگیێ د داخۆیانییەكا ڕۆژنامەڤانیدا ئاشكراكر» بالیۆزخانەیا ئەمریكا دووماهی مۆلەت دایە چارچۆڤەیێ هەماهەنگیێ تاكو چارەنڤیسێ نووری مالكی وەك بەربژار بۆ پۆستێ سەرۆك وەزیرێن نوو یێ ئیراقێ ئێكلابكەت».
وی ژێدەری دیاركر ژی» ڕۆژا ئێكشەمبی 22/2/2026، دووماهی ژ ڤانە بۆ ئێكلاكرنا ڤێ پرسێ، بۆ ڤێ چەندێ ژی سەركردەیێن چارچۆڤەیێ هەماهەنگیێ بزاڤێن خوە چڕتركرینە تاكو شوونگرەكی بۆ مالكی وەك بەربژار بۆ پۆستێ سەرۆك وەزیرێن ئیراقێ دەستنیشان بكەن».
پێشتر باسم عگێلی، ئەندامێ تیما راگەهاندنا هەڤپەیمانییا ئاڤەدانكرن و گەشەپێدان ب سەرۆكاتییا محەمەد شیاع سوودانی د داخۆیانییەكا ڕۆژنامەڤانیدا راگەهاند» چارچۆڤەیێ هەماهەنگیێ بزاڤا دەستنیشانكرنا دو بەربژارێن دی دكەت بۆ پۆستێ سەرۆك وەزیرێن نوو یێ ئیراقێ و پێكئینانا كابینەیا نوو یا حوكمەتا ئیراقێ، بۆ ڤێ چەندێ ژی هەر ئێك ژ محەمەد شیاع سوودانی و حەمید شەتری نێزیكن ژ وێ چەندێ وەك بەربژارێن چارچۆڤەیێ هەماهەنگیێ بۆ پۆستێ سەرۆك وەزیرێن ئیراقێ بهێنە راگەهاندن».
ل ڕۆژا 22/11/2025، جڤاتا شوورا یا حزبا دەعوەیا ئیسلامی ب تێكڕایا دەنگدان بڕیاردابوو، نووری مالكی، ئەمیندارێ گشتیێ حزبا دەعوە، بۆ پۆستێ سەرۆك وەزیرێن نوو یێ ئیراقێ بەربژار بكەت، بەلێ ل 27/1/2026، دۆنالد ترەمپ، سەرۆكێ ئەمریكا گەفەكا توند كر هەكە مالكی بۆ پۆستێ سەرۆك وەزیرێن نوو یێ ئیراقێ بهێتە بەربژاركرن.
بڕیاربوو ل ڕۆژا پێنجشەمبییا بۆری 19/2/2026، چارچۆڤەیێ هەماهەنگیێ كۆمببیت بۆ ئێكلاكرنا پۆستێ سەرۆك وەزیرێن نوو یێ ئیراقێ، بەلێ كەنالێ (ئەلجەزیرە) ژ زاردەڤێ سەركردەیەكی چارچۆڤەیێ هەماهەنگیێ بەلاڤكر» ئەو كۆمبوونا چارچۆڤەیێ هەماهەنگیێ كو بڕیاربوو ل ئێڤارییا ڕۆژا پێنجشەمبی 19/2/2026، بڕێڤەبچیت، هاتە هەلوەشاندن».
ناڤبری ئاشكراكربوو» كۆمبوون هاتە هەلوەشاندن، چونكە ژ ئەگەرێ پێداگیرییا نووری مالكی، سەرۆكێ هەڤپەیمانییا دەولەتا قانوونێ ل سر بەربژاركرنێ بۆ پۆستێ سەرۆك وەزیران، گرێدانا وێ كۆمبوونێ ب بێ مفا هاتبوو زانین».
