ئەمریكا دێ 150 ملیۆن دۆلاران بۆ سەقامگیریا عێراقێ تەرخان کەت
ئەڤرۆ نیوز ، زنار تۆڤی:
دۆگلاس سلێمان بالیۆزێ ئەمریكا ل عێراقێ راگەهاندیە،کو وەلاتێ وی دێ 75 ملیۆن دۆلارێن دیتر بۆ سەقامگیریا عێراقێ تەرخان کەت،ب ڤێ چەندێ دێ سەرجەمێ هاوكاریێن ئەمریكا د سالا 2018 بۆ سەقامگیریا بارێ تەناهیێ گەهیتە 150 ملیۆن دۆلاران.
د بەیاننامەكێدا ئەڤرۆ سێشەمبی 9.1.201 ،کو بالیۆزخانا ئەمریكا بەلاڤکریە و راگەهاندیە،حوکمەتا ئەمریكا گۆژمێ 75 ملیۆن دۆلارێن دیتر ل سالا 2018 وەك هاریكاری بۆ سەقامگیریکرنا بارێ تەناهیێ دێ پێشكێشی عێراقێ کەت.
هەروەسا بالیۆزخانا ئەمریكا روونکریە،کو سەرجەمێ هاریكاریێن ئەمریكا ل سالا 2018 دگەهنە 150 ملیۆن دۆلاران و زێدەتر گوتیە،ژ سالا 2015 تا نوکە هاریكاریێن ئەمریكا بۆ سەقامگیریا بارێ تەناهیێ ل عێراقێ گۆژمێ 265 ملیۆن و 300 هزار دۆلار وەک هاریكاری پێشكێشێ عێراقێ كرینە.
هەروەسا گوتیە ئەڤ گۆژمێ هاریكاریان،دێ یێ هاریکار بیت بۆ دووبارە گەهاندنا خزمەتگوزاریێن سەرەكی وەك ئاڤێ و كارەبێ،هەتا خێزان بشێن ڤەگەرنە سەر دەڤەرێن خۆ.
سلێمان روونكریە ژی،کو هاریكاریێن ئەمریكا دێ د چارچۆڤێ بەرنامێ گەشەپێدانا نەتەوێن ئێكگرتیدا هێتە خەرجکرن و دێ ب رێیا ئاژانسا نێڤدەولەتی یا گەشەپێدانا ئەمەریكا (USAID) بیت.
