ئەمریكا گەفێن سەپاندنا سزا و بلۆككرنا پارەیێ پەترۆلا ئیراقێ دكەت
وەزارەتا دەرڤەیا ئەمریكا حوكمەتا ئیراقێ ئاگەهدار دكەت، چەند كەسایەتی و ئالیێن سیاسی یێن ئیراقی سەرپەرشتییا چار تۆرێن قاچاخچیا پەترۆلێ دكەن كو ب چار گەشتان ب ناڤێ ئیراقێ، پەترۆلا ئیرانی د فرۆشنە بازارێن جیهانی و داهاتێ وێ ژی ددەنە ئیرانێ، ئەمریكا هۆشداری دایە ئیراقێ هەكە ئەو كەسایەتییە نەهێنە دەستەسەركرن، دێ سزای ئێخیتە سەر كۆمپانییا ب بازراكرنا پەترۆلا ئیراقی (سۆمۆ) و گۆژمەیێ 350 ملیۆن دۆلارێن پارەیێ پەترۆلا ئیراقێ دێ بلۆك كەت.
ئەحمەد سەرجی، شرۆڤەكارێ ئابۆریێ ئیراقی د داخۆیانییەكا رۆژنامەڤانیدا گوت» سزایێن ئەمریكا ل سەر ئیراقێ یێن بووینە گەلەك و دێ هێنە بجهئینان، چونكە ئیراق ئێكە ژ وان وەلاتێن نە پێگیر ب رێككەفتنان، لەوما زوورترین سزا دێ ل سەر هێنە سەپاندن، ئەڤێ چەندێ ژی دێ كاریگەرییا خراب ل سەر ئابۆرێ ئیراقێ هەبیت، ب تایبەت ب قاچاخ برنا پەترۆلا ئیرانی، كو هندەك كەسێن ئیراقی ل پشتن، ئەڤە كارەساتە و دڤێت وەزیرێ پەترۆلا ئیراقی رۆهنكرنێ بدەت و رێكێ نەدەت ژ بەر ئیرانێ تووشی سزایەكا ئەمریكی یا نوو ببین».
جڤاتا نوونەرێن ئیراقێ دخوازیت ڤەكۆلینا هوور ل سەر ڤێ كەیسێ بكەت، چونكە زێدەتر ژ 90% ژ داهاتێ ئیراقێ پشتبەستنێ ب پەترۆلێ دكەت و هەكە ئەو داهاتە بكەڤیتە د مەترسیێدا دێ قەیرانەكا دارایی یا مەزن پەیدا بیت، لەوما لژنەیا پەترۆل و غازێ ل جڤاتا نوونەرێن ئیراقێ ل حەفتییا داهاتی دێ وەزیرێ پەترۆلا ئیراقێ و هەردو رێڤەبەرێن كۆمپانییا (سۆمۆ) و كۆمپانییا ڤەگوهاستنا ل وەزارەتا ناڤبری گازیكەت بۆ لێپرسینێ ل دۆر كارێ قاچاخ فرۆشتنا پەترۆلا ئیرانی».
د. سەباح سوبحی، ئەندامێ لژنەیا پەترۆل و غازێ ل جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند» مە پەیوەندی ب وەزیرێ پەترۆلا فیدرالی كر تاكو بهێتە جڤاتا نوونەران و پرسیاران ل دۆر ڤی بابەتی ژێ بكەین، چونكە ئەو كارێ قاچاخ مەترسیێ دئێخیتە سەر هنارتنا پەترۆلا ئیراقێ».
گوت ژی» پتر ژ 90% ژ داهاتێ ئیراقێ پشتبەستنێ ب هنارتنا پەترۆلێ دكەت».
د چارچۆڤەیێ دۆرپێچا ئابۆرییا ئەمریكا ل سەر ئیرانێ، وەلاتێن جیهانێ هاتینە ئاگەهداركرن كو ب هەموو جۆرەكی قەدەغەیە پەترۆل و بەرهەمان ژ ئیرانێ بكڕن، هەر وەلاتەك ژی مامەلێ ل وی شێوەی بكەت دێ سزایێن ئابۆری كەڤنە سەر.
