ئەمریکا: ئسرائیل دێ ئاگربەستێ ڕاگەهینیت
بەرپرسەکێ ئەمریکا کو نەخواستیە ناڤێ وی بهێتە ئاشکرا کرن بۆ ئاژانسا رویتەرز یا نووچەیان دیار کریە، ئسرائیل رازی بوویە بۆ دەمێ ٦ هەفتیان ئاگربەست ل غەزە بهێتە راگەهاندن و ل هەمبەر دا دڤێت حەماس ژی هەموو گرتیێن ئسرائیلێ ئازاد بکەت، ژ بەر ڤێ یەکێ ژی نها ب ناڤبژیڤانیا ئەمریکا و هندەک وەلاتێن عەرەبی دانوستاندن ل گەل ئسرائیلێ و حەماسێ دهێنە کرن.
هەمان بەرپرسی ئەو یەک ژی دیار کریە، ئسرائیل یا بەرهەڤە ئاگربەستێ راگەهینیت و ئەو یەک ژی بێگومان گەلەک دێ باش بیت، چونکی پێدڤیا خەلکی ل غەزە ب هاریکاریێن مرۆڤی یێن بلەز هەیە، ب تایبەتی ژی زارۆ د رەوشەکا گەلەک خراب دانە و هەکە ئاگربەست بهێتە راگەهاندن دێ رێکخستنێن مافێن مرۆڤی شێن بلەز هاریکاریێن پێدڤی گەهینە دەستێ خەلکی، ڤێجا گرنگە حەماس ژی داخوازیێن ئسرائیلێ قەبوول بکەت و چو ئاستەنگیان ل هەمبەر ئاگربەستێ دروست نەکەت.
