ئەمریکا بڕیارەکا نوو سەبارەت ب پاراستنا هێزێن خوە ل سووریێ ددەت
فەرماندارەکێ ئەمریکی دیار کریە، ئێرشێن گرۆپێن چەکدار ل سووریێ ل سەر هێزێن وان زێدەتر بووینە، گرۆپێن چەکدار دخوازن ئەمریکا نەچار بکەن دا هێزێن خوە ژ سووریێ ڤەکێشیت ل هەمبەر ئێرشێن گرۆپێن چەکدار ئەمریکا هێزێن زێدەتر رەوانەی سووریێ کرینە و چەکێن گران ژی ل گەلەک بنگەهان بجهـ کرینە
فەرماندارەکێ ئەمریکی کو ناڤێ وی نەهاتیە ئاشکرا کرن بۆ ئاژانسا ئەناتولی دیار کریە، چەند رۆژن ل سووریێ هێزێن سەر ب ئیرانێ ب چەکێن گران و درۆنان ئێرشی هێزێن ئەمریکا دکەن، د ئەنجاما ئێرشێن وان گرۆپێن چەکدار دا زیان گەهشتیە هێزێن ئەمریکا، لێ هەتا نها چو زیانێن گیانی نەبووینە و ل هەمبەر ڤان ئیرشان ژی ئەمریکا بریار دایە هندەک بنگەهێن نوو ل دەڤەرێن ستراتیژی ل سووریێ ئاڤا بکەت و هەروەسا چەکێ گران ژی ل هەموو بنگەهان بهێنە بجهکرن.
هەمان فەرمانداری ئەو یەک ژی دیار کریە، د چارچۆڤێ شەرێ ل دژی تیرۆرێ دا ئەمریکا چەند رۆژە هێزێن زێدەتر رەوانەی باکورێ سووریێ ب تایبەتی ژی دێرازۆرێ کریە و چەکێ گران و پێشکەفتی ژی ل وان بنگەهان هاتینە دانان یێن گرۆپێن چەکدار ئێرشی وان دکەن، ژ بەر ڤێ یەکێ ژی قۆناغەکا نوو دێ ل هەمبەر وان گرۆپێن چەکدارێن سەر ب ئیرانێ ڤە دەستپێکەت و هەکە ئێرشێن وان بەردەوام بن ئەمریکا دێ ب توندی بەرسڤا وان دەت.
ئەو یەک د دەمەکێ دایە کو بەری چەند رۆژان وەزارەتا بەرگریێ یا ئەمریکا ژی دیار کربوو، ئیرانێ دڤێت ل سووریێ ئاریشێن نوو بۆ ئەمریکا دروست بکەت، گرۆپێن چەکدارێن سەر ب ئیرانێ ڤە ب درۆنان ئێرشی بنگەهێن ئەمریکا ل سووریێ دکەن، ئارمانجان ئیرانێ ئەوە دا ئەمریکا هەموو هێزێن خوە ژ سوورێێ ڤەکێشیت، لێ جارێ د بەرنامێ ئەمریکا دا تشتەک وەسا نینە و ژ بۆ شەرێ ل دژی تیرۆری ئەمریکا دێ ل سووریێ مینیت و هەکە ئێرشێن گرۆپێن سەر ب ئیرانێ ژی بەردەوام بن ئەمریکا دێ ل هەر جهەکێ دربێن کوژەک ل وان دەت.
چاڤدێرێن سیاسی ژی دیار دکەن، ئیرانێ دڤێت ب رێیا گرۆپێن چەکدار ئەمریکا نەچار بکەت دا هەموو هێزێن خوە ژ سووریێ و ئیراقێ ڤەکێشیت، نها هێزێن شیعە ل ئیراقێ ب رەنگەکێ جدی کار بۆ دەرخستنا هێزێن ئەمریکا دکەن، لێ ل سووریێ رەوشەکا دی یا هەی، چونکی دەستهەلاتا نها یا ل شامێ گەلەک لاوازە و ئەو شیان نینن ل دژی ئەمریکا راوەستیت، ژ بەر ڤێ یەکێ ژی گرۆپێن چەکدار هەر چەندە ئێرشی هێزێن ئەمریکا بکەن ژی لێ نەشێن ئەمریکا نەچار بکەن دا هێزێن خوە ژ سووریێ ڤەکێشیت و ب تایبەتی ژی نها پرانیا هێزێن ئەمریکا ل دەڤەرێن کوردی ل سووریێ بجه بووینە و ئەو یەک ژی ب دلێ ئیرانێ و گرۆپێن چەکدار نینە.
