ئەمریکا بێی مەرج ژ سووریێ دەرناکەڤیت
بابەتێ ڤەکێشانا هێزێن ئەمریکا ژ سووریێ و ئیراقێ د رۆژەڤێ دایە و چاڤدێرێن سیاسی ژی دیار دکەن، ئەمریکا هەکە بڤێت هێزێن خوە ژ سووریێ ڤەکێشیت ئەو یەک دێ ب مەرج بیت و رەنگە ب رێککەفتنەکێ ل گەل رۆسیا هێزێن خوە ڤەکێشیت لێ نها بابەتێ ڤەکێشانا ژ سووریێ د رۆژەڤا ئەمریکا دا نینە.
زەکەریا ئەحمەد چاڤدێرێ سیاسی یێ رۆژئاڤایێ کوردستانێ دیار کر، رەوشا رۆژهەلاتا ناڤین ب گشتی گەلەک یا ئالۆزە و پشتی ئێرشێن ڤێ دووماهیێ یێن گرۆپێن چەکدار ل سەر هێزێن ئەمریکا ژی رەوش ئالۆزتر لێ کریە، نها گرۆپێن سەر ب ئیرانێ هەم ل ئیراقێ و هەم ژی ل سووریێ یێ بزاڤا ڤێ یەکێ دکەن دا ئەمریکا هێزێن خوە ژ ئیراقێ و سورویێ ڤەکێشیت، لێ هەتا نها ژی بابەت ڤەکێشانا ژ سووریێ د رۆژەڤا ئەمریکا دا نینە، گەلەک کەس دبێژن هەکە ئەمریکا هێزێن خوە ژ ئیراقێ ڤەکێشیت دڤێت ژ سووریێ ژی دەرکەڤیت، راستە هاریکاریێن سەربازی ژ بنگەهێن ئەمریکا یێن ژ ئیراقێ دهێنە سووریێ، لێ ئەمریکا ل گەلەک جهێن دی ل رۆژهەلاتا ناڤین و وەلاتێن عەرەبی بنگەهێن خوە یێن سەرباز هەنە و هەر دەمێ بڤێت دشێت هێزێن نوو رەوانەی هەر جهەکێ ل رۆژهەلاتا ناڤین بکەت.
ناڤهاتی ئەو یەک ژی دیار کر، هەکە ئەمریکا بڤێت هێزێن خوە ژ سووریێ ڤەکێشیت ژی دڤێت هندەک تشت ل سووریێ بهێنە گوهۆڕین، چونکی هەکە نها ئەمریکا هێزێن خوە ڤەکێشیت ئەو یەک دێ بیتە شکەستنەکا گەلەک مەزن بۆ ئەمریکا، ژ بەر کو ئەمریکا هندەک ئارمانجێن خوە یێن جودا ل سووریێ هەنە و هەتا نەگەهیتە ئارمانجێن خوە گەلەک یا ب زەحمەتە کو هێزێن خوە ژ سووریێ ڤەکێشیت.
فاتمە عەفرینی چاڤدێرا سیاسی ژی دیار دکەت، جارێ رەوشا سووریێ وەکو یا ئیراقێ نینە، ل سووریێ رژێما بەشاری یا لاوازە و تنێ یێن کو بزاڤا هندێ دکەن ئەمریکا هێزێن خوە ڤەکێشیت گرۆپێن چەکدار سەر ب ئیرانێ نە، لێ گرۆپێن چەکدارێن سەر ب ئیرانێ ل سووریێ وەکو ئیراقێ نینن و گەلەک لاوازن، ژ بەر ڤێ یەکێ ژی ب گەف و فشارێن وان ئەمریکا هێزێن خوە ژ سووریێ ڤەناکێشیت، بەلکو بابەتێ ڤەکێشانێ ژی نها د رۆژەڤا ئەمریکا دا نینە، چونکی ناکۆکیێن گەلەک مەزن د ناڤبەرا ئەمریکا و رۆسیا دا سەبارەت ب پاشەرۆژا سووریێ هەنە و د رەوشەکا وەسا دا ئەمریکا یا بەرهەڤ نینە بێی رێککەفتنەکێ هێزێن خوە ژ سووریێ ڤەکێشیت.
هژمارەک زێدە ژ چاڤدێرێن سیاسی یێن کورد ل سووریێ و رۆژئاڤایێ کوردستانێ ژی دیار دکەن، هەکە ئەمریکا وەکو ئەفغانستانێ وەسا ژ سووریێ دەرکەڤیت ئەو یەک دێ ئەنجامێن خوە یێن گەلەک خراب بۆ کوردان هەبن، چونکی ب نەمانا ئەمریکا ل سووریێ، تورکیا و رژێما بەشاری دشێن پێکڤە ئێرشی کوردان ل رۆژئاڤایێ کوردستانێ بکەن.
