ئەمریکا داخوازیێن تورکیا ل دۆر رۆژئاڤایێ کوردستانێ قەبوول نەکرن
ب، سه‌رجان مەحمود:
وەزیرێ دەرڤە یێ ئەمریکا ل ئەنقەرە ل گەل هاکان فیدانێ وەزیرێ دەرڤە یێ تورکیا کۆمبوو و د کۆمبوونێ دا بەحسێ راگرتنا شەرێ ل غەزەیی هاتیە کرن، هەروەسا تورکیا جارەکا دی داخواز ژ ئەمریکا کر دەست ژ پشتەڤانیا هێزێن سووریا دیموکرات بەردەت، لێ وەزیرێ دەرڤە یێ ئەمریکا دیار کر ژ بۆ شەرێ ل دژی داعشێ دێ هەماهەنگیا وان ل گەل هێزێن سووریا دیموکرات یا بەردەوام بیت.
ئانتۆنی بلینکن وه‌زیرێ ده‌رڤه یێ ئه‌مریکا د چارچۆڤێ سه‌ره‌دانا خوه یا بۆ رۆژهه‌لاتا ناڤین، پشتی هه‌ڤدیتنێن ل گەل وه‌زیرێن ده‌رڤه یێن وه‌لاتێن وه‌ک، ئوردن، مسر، عه‌ره‌بستانا سعوودیێ، ئیراق، ئسرائیل و فه‌له‌ستینێ، سه‌ره‌دانا تورکیا کر و ل گەل هاکان فیدانێ وه‌زیرێ ده‌رڤه یێ تورکیا هه‌ڤدیتنه‌ک سازکر.
دەزگەهێن راگەهاندنا تورکیا دیار کرن، کو هەڤدیتنا ئانتۆنی بلینکن و هاکان فیدان دو ده‌مژمێر و نیڤان به‌رده‌وام کریە، ره‌وشا غەزە و ب فه‌رمی ناسکرنا ده‌وله‌تا فه‌له‌ستینێ و راگه‌هاندنا ئاگربه‌ستێ هاتنە گه‌نگه‌شه کرن و ئالیێ تورکیا ژ وه‌زیرێ ده‌رڤه یێ ئه‌مریکا داخواز کر فشاران بێخیته سه‌ر ئسرائیلێ دا کو کوشتنا وه‌لاتیێن سڤیل بهێته راوه‌ستاندن و ئاگربه‌ست بهێته راگه‌هاندن. ل هه‌مبه‌ر دا وه‌زیرێ ده‌رڤە یێ ئه‌مریکا ژی راگه‌هاند ئه‌و ژی ناخوازن وه‌لاتیێن سڤیل ببنە قوربانیا شه‌رێ ل غەزە‌یێ و ئاشکرا کر کو ئه‌و ژی ل گه‌ل چارەسەر‌کرنا قه‌یرانا نها ل فه‌له‌ستینێ نه.
ل ئالیێ دی رۆژناما مللیەت یا تورکیا ژی دیار کریە، د هه‌ڤدیتنێ دا بەحسێ پەیوەندیێن تورکیا و ناتۆ و فرۆتنا فرۆکێن F16 بۆ تورکیا هاتیه کرن. هه‌روه‌سا وه‌زیرێ ده‌رڤه یێ تورکیا ژ وه‌زیرێ ده‌رڤه یێ ئه‌مریکا خوا‌ستیه کو په‌یوه‌ندیێن ل گه‌ل هێزێن سوریا دیموکرات و رۆژئاڤایێ کوردستانێ بهێته بڕین و ره‌خنه ژی ل ئه‌مریکا گرتیە، دیسان هاکان فیدان نه‌رازیبوونا وه‌لاتێ خوه ژ به‌ر ئێخستنا فرۆکا بێ فرۆکه‌ڤان یا تورکیا ل باکوورێ سووریێ ژی دیار کریە و راگەهاندیە وەکو تورکیا ئەو ژ هەلوەستێ ئەمریکا دلگرانن.
ل هه‌مبه‌ر داخوازی و ره‌خنێن وه‌زیرێ ده‌رڤه یێ تورکیا، ئانتۆنی بلینکن ژی راگه‌هاندیه کو ئه‌و گرنگیێ دده‌نە داخوازیێن تورکیا، لێ د هه‌مان ده‌می دا ژی دڤێت ئارامیا باکورێ سووریێ بهێته پاراستن. هه‌روه‌سا ئاشکرا ژی کریه، کو هەماهەنگیا وان ل گەل هێزێن سووریا دیموکرات بۆ ژناڤبرنا داعشێ دێ یا بەردەوام بیت، چونکی نها ژی داعش مەترسیەکا مەزنە و دڤێت شەرێ ل دژی داعشێ ب هەموو رەنگەکێ بەردەوام بیت.
چاڤدێرێن سیاسی ژی دیار دکەن، تورکیا ژ هەلوەستێ ئەمریکا سەبارەت ب رۆژئاڤایێ کوردستانێ یا دلگرانە، چونکی هەتا نها ژی ئەمریکا چو داخوازیێن تورکیا ل دۆر رۆژئاڤایێ کوردستانێ قەبوول نەکرینە، ئەو یەک دشێت کاریگەریا خوە ل سەر پەیوەندیێن هەر دو ئالیان هەبیت، لێ دیسان ژی تورکیا یا رژدە دا ئەمریکا رازی بکەت دەست ژ پشتەڤانیا یەپەگێ و هێزێن سووریا دیموکرات بەردەت.
