ئەمریکا داخوازەکێ ژ هەر دو جڤاتێن کوردی یێن رۆژئاڤایێ کوردستانێ دکەت
بەرپرسەکێ رێڤەبەریا خوەسەر یا رۆژئاڤایێ کوردستانێ دیار دکەت، شاندەکێ ئەمریکی ل رۆژئاڤایێ کوردستانێ نە و ئەمریکی دخوازن هەر دو جڤاتێن کوردی دەست ب قۆناغەکا نوو بکەن و پرسێن هەی د ناڤبەرا خوە دا چارەسەر بکەن.
بەرپرسەکێ رێڤەبەریا خوەسەر کو ناڤێ وی نەهاتیە ئاشکرا کرن بۆ دەزگەهێن راگەهاندنا سەر ب رێڤەبەریا خوەسەر دیار کریە، نها شاندەکێ ئەمریکا ل رۆژئاڤایێ کوردستانێ نە و ل گەل ئەنجوومەنێ نشتیمانی یێ کوردی ل سووریێ کۆمبووینە و هەروەسا ل گەل رێڤەبەریا خوەسەر ژی کۆمبووینە، نها ژ بۆ ئەمریکا گەلەک یا گرنگە هەر دو جڤاتێن کوردی یێن رۆژئاڤایێ کوردستانێ دەست ب قۆناغەکا نوو بکەن، ژ بۆ ئەمریکا نها یا هەری گرنگ دەستپێکرنا قۆناغەکا نوو یە د ناڤبەرا هەر دو جڤاتێن کوردی یێن رۆژئاڤایێ کوردستانێ دا، ژ بەر ڤێ یەکێ ژی بەری دەمەکێ بەرپرسەکێ وەزارەتا دەرڤە یا ئەمریکا دیار کربوو جارێ رەوش بۆ هەلبژارتنان ل باکورێ سووریێ یا گونجای نینە، چونکی ژ بۆ ئەمریکا گرنگە بەری هەلبژارتنان هەر دو جڤاتێن کوردی پرسێن هەی د ناڤبەرا خوە دا چارەسەر بکەن.
هەمان بەرپرسی ئەو یەک ژی دیار کریە، رێڤەبەریا خوەسەر و پەیەدە پێشوازیێ ل هەلوەستێ نوو یێ ئەمریکا دکەن و دخوازن پرسێن هەی ل گەل ئەنجوومەنێ نشتیمانی یێ کوردی ل سووریێ ب رێیا دانوستاندنان بهێنە چارەسەر کرن، ژ بەر ڤێ یەکێ ژی شاندێ ئەمریکا سەرەدانا رۆژئاڤایێ کوردستانێ کرینە و هەتا نها ژی شاندێ ئەمریکی ل رۆژئاڤایێ کوردستانێ نە و ل گەل هەر دو جڤاتێن کوردی ژی کۆمبووینە و دیارە دێ گەرەکا دی یا دانوستاندنان د ناڤبەرا هەر دو جڤاتێن کوردی دا هێتە کرن.
ل گۆر باوەریا هەمان بەرپرسی هەلبژارتنێن باژێرڤانیان نها ژ بۆ رۆژئاڤایێ کوردستانێ و باکورێ سووریێ گەلەک گرنگن، چونکی ئەو یەک دێ بیتە ئەگەر پتر خزمەتا خەلکی بهێتە کرن، دڤێت کاروبارێن خەلکی بهێنە رێکخستن کرن و ژ بۆ ڤێ یەکێ ژی گەلەک یا گرنگە هەلبژارتن بهێنە کرن، ئەمریکا ل دژی هەلبژارتنان نینە، بەلکو تنێ بەرپرسەکێ وەزارەتا دەرڤە یا ئەمریکا بەری چەند رۆژان دیار کربوو رەوش بۆ هەلبژارتنان یا گونجای نینە، چونکی ژ بۆ ئەمریکا نها یا هەری گرنگە ئەوە هەر دو جڤاتێن کوردی یێن رۆژئاڤایێ کوردستانێ پرسێن هەی د ناڤبەرا خوە دا چارەسەر بکەن.
ئەو یەک د دەمەکێ دایە کو بەری نها چەندین جاران سەرکردێن ئەنجوومەنێ نشتیمانی یێ کوردی ل سووریێ دیار کرینە، باوەریا وان ب سۆزێن پەیەدێ ناهێت و هەتا ئەمریکا یان وەلاتەکێ دی نەبیتە ئالیێ سیێ ئەو ل گەل پەیەدێ و تەڤدەمێ دەست ب چو دانوستاندنان ناکەن، چونکی بەری نها سێ رێککەفتن د ناڤبەرا وان و پەیەدێ دا هاتینە کرن، لێ پەیەدێ پێگیری ب رێککەفتنان نەکریە.
