ئەمریکا: درێژکرنا دەمێ ئاگربەستێ پێنگاڤەک گرنگە
شیرەتکارێ ئاسایشا نشتیمانی یا کۆچکا سپی د داخۆیانیەکێ دا دیار کر، درێژکرنا دەمێ ئاگربەستێ بۆ دو رۆژێن دی ژ ئالیێ ئسرائیلێ و حەماسێ پێنگاڤەک گرنگە، لێ وەکو ئەمریکا ئەو دخوازن ئاگربەست بۆ دەمەکێ درێژ بەردەوام بیت دا هەر دو ئالی هەموو گرتیان ئازاد بکەن، هەروەسا گرنگە هاریکاریێن مرۆڤی ژی بگەهنە غەزە دا چ کارەساتێن مرۆڤی ل غەزە روو نەدەن.
جۆن کێربی ئەو یەک ژی دیار کر، ئەو سوپاسیا بزاڤێن وەلاتێ قەتەرێ دکەن کو شیایە ب هەماهەنگی ل گەل ئسرائیلێ و حەماسێ دەمێ ئاگربەستێ بۆ دو رۆژێن دی ژی درێژ بکەت، ئەو یەک پێنگاڤەک ئەرێنی یە، لێ دڤێت ئاگربەست بۆ دەمەکێ دی بهێتە درێژکرن و وەکو ئەمریکا ئەو ل سەر ڤی بابەتی کار دکەن، چونکی پێدڤیە رێگری ل کارەساتێن مرۆڤی ل غەزە بکەین، مخابن بەردەوامیا شەری دێ بیتە ئەگەرێ روودانا کارەساتێن مەزن و ژ بۆ ڤێ یەکێ گەلەک گرنگە دەمێ ئاگربەستێ جارەکا دی بهێتە درێژکرن.
