ئەمریکا دێ هێزێن زێدەتر رەوانەی رۆژهەلاتا ناڤین کەت
رۆژنامەکا ئەمریکی دیار کریە، ژ بەر ئالۆزیێن ڤێ دووماهیێ و ئێرشێن گرۆپێن چەکدار ل سەر بنگەهێن ئەمریکا، وی وەلاتی بریار دایە هێزێن زێدەتر رەوانەی رۆژهەلاتا ناڤین بکەت، هەروەسا ئەمریکا دێ سیستەمێ بەرگریێ مۆشەکی ژی ل پڕانیا بنگەهێن خوە بجه کەت دا رێگریێ ل هەر ئێرشەکێ مۆشەکی و درۆنی بهێتە کرن.
رۆژناما واشنتۆن پۆست د راپۆرتەکێ دیار کریە، پشتی شەرێ ئسرائیلێ و حەماسێ رەوشا رۆژهەلاتا ناڤین یا ئالۆزتر لێ دهێت، گرۆپێن چەکدار یێن سەر ب ئیرانێ ژی ل ئیراقێ و دەڤەرێن دی دخوازن ئێرشی بنگەهێن ئەمریکا بکەن، ژ بەر ڤێ یەکێ ژی پنتاگۆنێ بریار دایە بلەز هێزێن زێدەتر رەوانەی رۆژهەلاتا ناڤین بهێتە کرن، هەروەسا ئەمریکا دێ سیستەمێ بەرگریێ یێ مۆشەکی ئانکۆ (پاتریۆت) ل هەموو وان بنگەهێن بجه کەت یێن هێزێن ئەمریکا لێ هەنە دا رێگری ل هەر ئێرشەکی بهێتە کرن.
هەمان رۆژنامێ ئەو یەک ژی دیار کریە، نها پتر ژ هەر دەمەکێ مەترسی ل سەر هێزێن ئەمریکا هەنە، چونکی بریارا ئەمریکا یا بۆ پشتەڤانیا ئسرائیلێ وەسا کریە، ئیران و گرۆپێن چەکدارێن سەر ب وێ بخوازن ل ئیراقێ، سووریێ و وەلاتێن دی مەترسیێ بۆ هێزێن ئەمریکا دروست بکەن، نها ژی رۆژانە ل ئیراقێ ئێرشی بنگەهێن ئەمریکا دکەن، ئەو یەک ژی بێ بەرسڤ نامینیت و ئەمریکا دێ ب هنارتنا هێزێن زێدەتر بۆ رۆژهەلات ناڤین و بجهکرنا سیستەمێ بەرگریێ یێ مۆشەکی بەرسڤا ئیرانێ و هێزێن سەر ب وێ ڤە دەت.
ئەو یەک د دەمەکێ دایە بەری دو رۆژان پەیڤدارێ وەزارەتا بەرگریێ یا ئەمریکا ژی دیار کربوو، وەکو ئەمریکا وان خوە بۆ هەر ئەگەرەکێ بەرهەڤ کرینە و هۆشداری ژی دابوو ئیرانێ هەکە مەترسیێ بۆ هێزێن وان ل ئیراقێ و دەڤەرێن دی دروست بکەت ئەمریکا دێ بلەز بەرسڤا هەر ئێرشەکێ دەت.
ل ئالیێ دی ئاژانسا رویترز ژی د راپۆرتەکێ دا ئاماژە ب هندێ کریە، بەرپرسێن ئەمریکا ژ رەوشا نها یا شەرێ ل ئسرائیلێ دلگرانن، چونکی بهێزبوونا حەماسێ دێ کاریگەریەکا خراب ل بەرژەوەندیێن ئەمریکا کەت، ژ بەر ڤێ یەکێ ژی دڤێت ئیدارا جۆ بایدن پتر هاریکاریا ئسرائیلێ بکەت.
هەمان ئاژانسێ ئەو یەک ژی دیار کریە، درێژبوونا شەرێ نها دشێت لوبنانێ ژی بکەتە مەیدانا شەری، چونکی نها ئالۆزیێن مەزن ل سەر سنۆرێ لوبنانێ هەنە و ئسرائیلێ ژی بەری نها ب توندی هۆشداری دایە لوبنانێ کو نەبیتە پشتەڤانا گرۆپێن چەکدارێن وەکو حەماسێ و رێ نەدەت حزبوللا ئاخا وی وەلاتی ل دژی ئسرائیلێ بکار بینیت.
چاڤدیرێن سیاسی ژی دیار دکەن، رەوشا نها یا رۆژهەلاتا ناڤین گەلەک خرابە، پرانیا وەلاتێن عەرەبی ب چو رەنگەکێ بەرهەڤ نینن ببنە پشکەک ژ شەرێ نها، بەلکو تنێ ب داخۆیانیان ئسرائیلێ شەرمزار دکەن و ب کریاری ل دژی ئسرائیلێ چو نەکرینە، ژ بەر کو چو وەلاتەکێ نها نەڤێت شەر بەرفرەهتر لێ بهێت، چونکی ئەو یەک دێ بیتە ئەگەرێ روودانا قەیرانەکا گەلەک مەزن و دێ کاریگەریا خوە یا خراب ل هەموو وەلاتێن رۆژهەلاتا ناڤین کەت، ژ بەر ڤێ یەکێ ژی هەت نها وەلاتێن بهێز یێن وەکو عەرەبستانا سعوودیێ چو هەلوەستەک توند ل دژی ئسرائیلێ نەبوویە، ئەو یەک ژی نیشا ددەت دێ دیسان وەلاتیێن سڤیل یێن غەزە بنە قوربانیێن شەری.
