ئەمریکا: رۆسیا ل گەل ئیرانێ و تورکیا کار بۆ دەرئێخستنا هێزێن مە ل سووریێ دکەن
بەرپرسەکێ وەزارەتا بەرگریێ یا ئەمریکا راگەهاند، دەمەکە رۆسیا ل گەل ئیرانێ و تورکیا هەماهەنگیێ دکەن بۆ دەرخستنا هێزێن مە ل سووریێ و نها ل گەل شامێ ژی ژ بۆ هندێ د ناڤ هەماهەنگیێ دا کار دکەن، لێ هەتا شەرێ ل دژی داعشێ ل سووریێ ب دووماهی نەهێت و مەترسی ل سەر بەرژەوەندیێن ئەمریکا هەبن دێ هێزێن ئەمریکا ل سووریێ مینن.
بەرپرسەکێ وەزارەتا بەرگریێ یا ئەمریکا کو ناڤێ وی نەهاتیە ئاشکرا کرن بۆ رۆژنامەیا واشنتۆن پۆست یا وی وەلاتی دیار کریە، دەمەکە رۆسیا ل گەل تورکیا، ئیرانێ و رژێما سووریێ پێکڤە کار دکەن دا هێزێن ئەمریکا نەچار بکەن ژ سووریێ دەرکەڤن، دەمەکە هێزێن چەکدارێن سەر ب ئیرانێ ڤە ل سووریێ ل گەل هێزێن رژێما بەشاری کار بۆ هندێ دکەن دا دەست ب ئێرشێن جودا جودا ل دژی هێزێن ئەمریکا بکەن، یا راست ئیرانێ دڤێت ئەو ئالۆزیێن بەری چەند سالان ل ئیراقێ بۆ هێزێن ئەمریکا دروست کرین هەمان تشتی ل سووریێ ژی دوبارە بکەن و ژ بەر هندێ ژی هێزێن ئەمریکا ل چەندین دەڤەرێن ستراتیژی ل باکورێ سووریێ بجه بووینە و بەری نها ئەمریکا ب توندی ژی هۆشداری دایە ئیرانێ هەر ئێرشەک ل دژی هێزێن ئەمریکا بهێتە کرن دێ ب توندی بەرسڤا وان دەن.
هەمان بەرپرسی ئاماژە ب هندێ ژی کریە، پشتی شەرێ ئۆکرانیایێ هەڤسەنگیێن سیاسی تا رادەیەکێ د بەرژەوەندیا بەشاری دا هاتینە گوهۆڕین، چونکی نها وەکو جاران چاڤێ وەلاتێن رۆژئاڤایی ل سەر سووریێ نینە، ژ بەر کو شەڕێ ل ئۆکرانیایێ کاریگەریا خوە ل هەموو جیهانێ کریە، وەلاتێن رۆژئاڤایی ژی نها ژ بۆ پاراستنا خوە پتر بەرهەڤیان دکەن و ئەو یەک ژی بوویە ئەگەرێ هندێ سەرۆکێ رژێما سووریێ بشێت ل گەل وەلاتێن عەرەبی تا رادەیەکێ پەیوەندیێن خوە باش بکەت، ڤێجا نها ژی سووریێ دڤێت ب پشتەڤانیا ئیرانێ و رۆسیا ئێرشی هێزێن مە بکەت، لێ دێ ب توندی بەرسڤا هەر ئێرشەکێ دەین.
چاڤدێرێن سیاسی ژی دیار دکەن، رۆسیا دڤێت ئەو تنێ خوەدانا بریارێ بیت ل سووریێ، بەری نها ژی گەلەک جاران بەرپرسێن رۆسیا ئەو یەک ب رەنگەکێ ئاشکرا دیار کرینە، ژ بەر هندێ ژی نها رۆسیا دڤێت ب هەر رەنگێ هەی ل سووریێ پێگەهێ ئەمریکا لاواز بکەت و هێزێن ئەمریکا نەچار بکەت ژ سووریێ دەرکەڤن، هەماهەنگیەکا گەلەک باش ژی د ناڤبەرا رۆسیا و ئیرانێ دا هەیە و تورکیا ژی پشتەڤانە، چونکی هەکە هێزێن ئەمریکا ل سووریێ نەمینن وی دەمی تورکیا دشێت ئێرشی وان دەڤەران بکەت یێن کو نها ل ژێر دەستێ هێزێن سووریا دیموکرات دانە، ژ بەر کو هەتا نها ئەمریکا رێگرە ل ئۆپەراسیۆنەکا نوو یا تورکیا ل دژی هێزێن سووریا دیموکرات و رێڤەبەریا خوەسەر یا باکورێ سووریێ.
