ئەمریکا سووریێ ب ئەشکەنجەدانا گرتیان تۆمەتبار دکەت
ئەڤرۆ نیوز ، فاتما مزووری:
ئه‌مریكا رژێما سوریێ ب كوشتنا هزاران گرتیێن سیاسی دبن ئیشكه‌نجێ دا تۆمه‌تبار دكەت و وی كاری شه‌رمزار دكه‌ت، هه‌روه‌سا ئەمریكا ژ رژێما سوریا داخواز دكه‌ت ده‌ربارێ گرتیێن سیاسی پابه‌ندیێ ب یاسا و پره‌نسیبێن نێڤده‌وله‌تی بكەت.
په‌یڤدارا وه‌زاره‌تا ده‌رڤه یا ئه‌مریكا هێزه‌ر ناوێرت د داخویانیه‌كێ دا راگه‌هاند،کو ئه‌و راپۆرتێن ڤێ داویێ یێن رژێما سوریا كو كوشتنا ب هزاران گرتیێن سیاسی د زیندانان دها ته‌كه‌ز دكه‌ت، مه‌ترسیا جڤاكا نێڤده‌وله‌تی پشتراست دكه‌ت.
ناوێرتێ گۆت ژی، جیهان ژبیر ناكه‌ت كو رژێمێ ب ئاوایه‌كێ سیسته‌مایه‌تی ب ده‌هان هزار كه‌سێن سڤیل ژبه‌ر داخوازێن وان یێن ره‌وا ژبۆ ئازادیێ و ماف و چاكسازییان گرتینە و ئیشكه‌نجه داینە و کوشتینە، هه‌روه‌سا په‌یڤدارا وه‌زاره‌تا ده‌رڤه یا ئه‌مریكا ئه‌شكه‌ره كر ژی، كو ل گۆری رێکخستنێن مافێ مرۆڤان ژ ده‌ستپێكا شه‌رێ سوریا د سالا 2011 هه‌یا نها زێده‌تری 117 هزار كه‌سان هاتینه گرتن و پرانیا وان د زیندانێن رژێمێ دا‌نه و دهێنە ئەشكه‌نجه‌دان، هه‌روه‌سا ناوێرت گۆت كو ئه‌مریكا دێ ل گه‌ل جڤاتا نێڤده‌وله‌تی كار ل سه‌ر لێكۆلینان کەت ، هەتا به‌رپرسیارێن ڤی كاری بهێنە سزادان .
