ئەمریکا سەبارەت ب سووریێ هۆشداریێ ددەتە تورکیا
وەزارەتا بەرگریێ یا ئەمریکا راگەهاند، بزاڤێن ڤێ دووماهیێ یێن تورکیا دبنە ئەگەرێ هندێ رەوشا باکورێ سووریێ پتر ئالۆز ببیت، ئەو یەک د بەرژەوەندیا تورکیا دا نینە، چونکی هەر ئالۆزیەکا نوو دێ بیتە ئەگەرێ هندێ داعش و رێکخستنێن دی یێن تیرۆرستی بهێز کەڤن، ژ بەر ڤێ یەکێ ژی دڤێت تورکیا کار بۆ ئارامیێ ل باکورێ سووریێ بکەت.
وەزارەتا بەرگریێ یا ئەمریکا راگەهاند، ئێرشێن ڤێ دووماهیێ یێن تورکیا ل سەر هندەک دەڤەران ل باکورێ سووریێ د خزمەتا چو ئالیەکێ دا نینە، چونکی نها ب گشتی رەوشەکا هەستیار ل دەڤەرێ هەیە، رێکخستنێن تیرۆرستی یێن وەکو داعشێ ژی بزاڤا ڤێ یەکێ دکەن جارەکا دی خوە بهێز بکەن و دەست ب کریارین تیرۆرستی بکەن، ژ بەر ڤێ یەکێ ژی دڤێت تورکیا ل گۆر راستیا نها ل سووریێ کار بکەت و ب بزاڤێن خوە نەبیتە ئەگەرێ ئالۆزیێن زێدەتر، چونکی ئەو یەک د بەرژەوەندیا تورکیا دا نینە، نابیت تورکیا ببیتە ئەگەرێ ئالۆزبوونا رەوشا نها ل باکورێ سووریێ، هەر ئالۆزیەک دێ کاریگەریا خوە یا خراب بۆ تورکیا ژی هەبیت.
وەزارەتا بەرگریێ یا ئەمریکا سەبارەت ب ئێرشێن ڤێ دووماهیێ یێن هێزێن سەر ب ئیرانێ ژی دیار کریە، هێزێن چەکدارێن سەر ب ئیرانێ دەمەکە ل دەڤەرێن جودا جودا ل سووریێ ئێرشی هێزێن ئەمریکا دکەن، وەکو ئەمریکا وان چەند جاران ب توندی بەرسڤا وان هێزان داینە و نها ژی هەم ل سووریێ و هەم ژی ل ئیراقێ هێزێن ئەمریکا ب هەموو رەنگەکێ د ئامادەباشیێ دانە و هەر ئێرشەکا نوو بهێتە کرن ڤێجارێ ئەمریکا دێ ب رەنگەکێ جوداتر بەرسڤا وان دەت، سەبارەت ب ئێرشێن وان گرۆپان ژی ئەمریکا چەندین جاران هۆشداری دایە ئیرانێ و دڤێت ئیران رێ نەدەت گرۆپێن چەکدار ل سووریێ جارەکا دی ئێرشی هێزێن ئەمریکا بکەن، چونکی ڤێجارێ ژی ئەو ئێرشی هێزێن ئەمریکا بکەن دێ بەرسڤا ئەمریکا یا توند بیت.
ئەو یەک د دەمەکێ دایە بەری نها فەرماندارەکێ هێزێن ئەمریکا ل رۆژئاڤایێ کوردستانێ ژی دیار کربوو، ئیران و رۆسیا ب رێیا گرۆپێن چەکدار بزاڤا ڤێ یەکێ دکەن دا ئالۆزیێن نوو بۆ ئەمریکا دروست بکەن، وان دڤێت رەوشا باکورێ سووریێ ئالۆز بکەن دا ئەمریکا یا نەچار بیت هەموو هێزێن خوە ژ باکورێ سووریێ ڤەکێشیت، لێ هەتا داعش و گرۆپێن دی یێن تیرۆرستی ل سووریێ هەبن ئەمریکا ژی دێ ل باکورێ سووریێ مینیت و دێ ب توندی ژی بەرسڤا هەر ئیرشەکێ دەت کو مەرەم ژێ دروستکرنا مەترسیان بیت بۆ بەرژەوەندیێن ئەمریکا.
چاڤدێرێن سیاسی ژی دیار دکەن، نها ئالۆزیێن مەزن ل دۆر سووریێ د ناڤبەرا ئەمریکا و رۆسیا دا هەنە، لێ ژ بەر شەرێ ئۆکرانیایێ و هەروەسا شەرێ نها د ناڤبەرا ئسرائیلێ و حەماسێ دا بابەتێ سووریێ جارێ وەکو پێدڤی د رۆژەڤا ئەمریکا و رۆسیا دا نینە.
