ئەمریکا ل دۆر حوسییان داخوازەکێ ژ وەلاتێن جیهانێ دکەت
وەزارەتا دەرڤە یا ئەمریکا راگەهاند کو د چەند رۆژێن بۆری دا جارەکا دی حوسیێن یەمەنێ ب چەکێن پێشکەفتی ئێرشی چەند گەمیێن بازرگانی ل دەریا سۆر کرینە و زیانێن گەلەک مەزن ژی گەهشتینە گەمیەکا یونانێ، ژ بەر ڤێ یەکێ ژی دڤێت ئێدی د ئاستێ نێڤدەولەتی دا ل دژی حوسییان دەست ب بزاڤەکا مەزن بهێتە کرن، چونکی حوسیێن یەمەنێ بووینە مەترسیەکا گەلەک مەزن ل سەر بازرگانیا جیهانی و دەم یێ هاتی هەموو وەلاتێن جیهانێ ل دژی حوسییان هاریکاریا هەڤدو بکەن.
وەزارەتا دەرڤە یا ئەمریکا ئەو یەک ژی دیار کریە، بەری نها وان و بریتانیا چەندین جاران ئێرشی بنگەهێن سەربازی یێن حوسییان ل یەمەنێ کرینە، لێ هێشتا حوسی مەترسینە و ژ بەر ڤێ یەکێ ژی دڤێت هەموو وەلاتێن جیهانێ هەست ب مەترسیا حوسییان بکەن، گرنگە هەموو وەلاتێن جیهانێ پێکڤە کار بکەن دا نەهێلن مەترسیا حوسییان ل سەر بازرگانیا جیهانی زێدەتر لێ بهێت.
