ئەمریکا: هێزێن مە دێ بۆ دەمەکێ درێژ ل سووریێ مینن
فەرماندارەکێ هێزێن ئەمریکا ل سووریێ راگەهاند، هەرچەندە د ڤان دەمێن دووماهیێ دا هندەک گرۆپێن چەکدار ل دەڤەرێن جودا جودا یێن سووریێ ئێرشی هێزێن وان کرینە، لێ وەکو ئەمریکا وان پێگەهێ خوە ل باکورێ سووریێ و رۆژهەلاتێ فراتێ بهێزتر لێ کرینە و د چارچۆڤێ شەرێ ل دژی داعشێ دا ئەو دێ بۆ دەمەکێ درێژ ل سووریێ مینن و چو بەرنامێ وان بۆ ڤەکێشانا هێزێن خوە ل سووریێ نینن.
هەمان فەرمانداری کو ناڤێ وی نەهاتیە ئاشکرا کرن ئەو یەک ژی دیار کریە، هێشتا مەترسیا داعشێ ل سووریێ یا هەی، ب تایبەتی ژی پشتی ئالۆزیێن ڤێ دووماهیێ ل رۆژهەلاتا ناڤین، داعشێ دڤێت ل سووریێ پێگەهێ خوە بهێز بکەت و ئێرشی هندەک دەڤەران بکەت، بێگومان ئەو یەک دێ بیتە ئەگەرێ روودانا ئالۆزیێن نوو، چونکی بهێزبوونا داعشێ دێ بیتە مەترسی ل سەر هەموو رۆژهەلاتا ناڤین و ئەو یەک د بەرژەوەندیا چو وەلاتەکێ دا نینە، ژ بەر ڤێ یەکێ ژی وەکو ئەمریکا ئەو دێ ب هەموو رەنگەکێ بەردەوامیێ دەنە شەرێ ل دژی داعشێ، د چارچۆڤێ شەرێ ل دژی داعشێ دا ئەو دێ بەردەوام ل گەل هێزێن سووریا دیموکرات ژی د ناڤ هەماهەنگیێ دا بن.
ئەو یەک د دەمەکێ دایە بەری نها وەزارەتا بەرگریێ یا ئەمریکا ژی راگەهاند، رۆسیا و ئیرانێ دڤێت ب رێیا گرۆپێن چەکدار ئاریشێن نوو ل سووریێ بۆ هێزێن ئەمریکا دروست بکەن، ئێرشێن ڤێ دووماهیێ بۆ هندێ نە دا ئەمریکا هەموو هێزێن خوە ژ سووریێ ڤەکێشیت، لێ هەتا مەترسیا داعشێ ل سووریێ هەبیت ئەمریکا دێ ل سووریێ مینیت، چونکی نها ژی رۆژانە داعش و گرۆپێن دی یێن تیرۆرستی دخوازن ئاخا سووریێ بۆ کریارێن خوە یێن تیرۆرستی بکار بینن، ژ بەر ڤێ یەکێ ژی هێزێن ئەمریکا دێ بۆ دەمەکێ درێژ ل سووریێ مینن و ئەمریکا یا نەچارە د چارچۆڤێ شەرێ ل دژی داعشێ دا پێگەهێ خوە ل سووریێ بهێزتر ژی بکەت.
