ئەمریکا: هەتا پێدڤی بیت دێ هێزێن مە ل سووریێ مینن
ب، سه‌رجان مەحمود:
فەرماندارەکێ ئەمریکا دیار دکەت، د بەرنامەیێ وان دا نینە کو هێزێن خوە ژ سووریێ ڤەکێشن و ژ بەر داعشێ و رەوشا نها یا تایبەت ل سووریێ دێ هێزێن وان بۆ دەمەکێ درێژ ل سووریێ مینن و چو گوهۆڕینەک د سیاسەتا ئەمریکا دا ل سووریێ روو نەدایە.
فەرماندارەکێ هێزێن ئەمریکا یێن ل سووریێ د داخویانیەکێ دا بۆ رۆژنامەیا واشنتۆن پۆست یا ئەمریکا دیار کریە، راستە نها رەوشا سووریێ هەتا رادەیەکێ ئارامە، لێ داعش ل سووریێ رۆژ ب رۆژێ بهێز دبیت و زانیاریێن تەمام ل بەر دەستێ وان هەنە، کو داعشێ دڤێت جارەکا دی دەست ب کریارێن تیرۆرستی بکەت، ژ بەر ڤێ یەکێ ژی وەکو هێزێن ئەمریکا ئەو دێ ل سووریێ مینن و نها د بەرنامەیێ وان دا نینە کو هێزێن خوە ژ سووریێ ڤەکێشن، چونکی پێدڤیا سووریێ ب ئارامیێ هەیە و خەلکێ سووریێ ژی ب تایبەتی ژی وەلاتیێن باکور و رۆژهەلاتێ سووریێ ناخوازن هێزێن ئەمریکا ژ سووریێ بچن.
هەمان فەرمانداری ئەو یەک ژی دیار کریە، جارێ ل سووریێ چو لەشکرەک بسپۆر و ئێکگرتی ژی نینە، ل سوەیدا دەرکەفت کا کۆمێن چەکدار چ کرن، ئانکو مەترسی ل سەر پێکهاتەیێن ل سووریێ هەیە، ئەمریکا دڤێت رەوشا سووریێ ئارام بیت و مەترسیا داعشێ و گرۆپێن دی یێن تیرۆرستی ژی نەمینن، بێگومان هەکە تشتەک وەسا ل سووریێ دروست ببیت و پێدڤیا سووریێ ب هێزێ ئەمریکا نەمینیت وی دەمی دێ ئەمریکا بریارا خوە دەت، لێ جارێ چو گوهۆڕینەک د سیاسەتا ئەمریکا دا ل سووریێ دروست نەبوویە و دێ هێزێن ئەمریکا ل وان جه مینن یێن کو نها لێ هەنە.
سەبارەت ب هێزێن سووریا دیموکرات ژی هەمان فەرمانداری دیار کریە، هێزێن سووریا دیموکرات هەڤپەیمانێ ئەمریکا نە، هەسەدێ د شەڕێ ل دژی داعشێ دا رۆلەک سەرەکی ل سووریێ گێرایە و نها ژی ئەو ل هەموو دەڤەرێن کو هەنە کار بۆ ئارامیێ دکەن، ئەمریکا دێ بەردەوام بیت د پشتەڤانیکرنا هەسەدێ دا و هەسەدە بوویە هێزەکا گەلەک مەزن و کاریگەر ژ بۆ ئارامیێ نە تنێ ل رۆژئاڤایێ کوردستانێ بەلکو ل دێرازۆرێ و رەققە ژی هەسەدێ شیایە رەوشا وان دەڤەران کۆنترۆل بکەت و رێ ل چالاکیێن داعشێ و گرۆپێن دی یێن تیرۆرستی بگریت، ژ بەر ڤێ یەکێ ژی ئەمریکا دێ بەردەوام هاریکاریا هەسەدێ کەت.
ئەو یەک د دەمەکێ دایە کو بەری چەند رۆژان مەزلوم عەبدی فەرماندارێ گشتی یێ هەسەدێ ژی دیار کربوو هەبوونا هێزێن ئەمریکا ل سووریێ ژ بۆ ئارامیا سووریێ گەلەک گرنگە، چونکی داعشێ دڤێت جارەکا دی خوە ل سووریێ ب رێکخستن بکەت و دەست ب کریارێن تیرۆرستی بکەت، هەکە ئەمریکا هێزێن خوە ڤەکێشیت دێ رەوشا سووریێ گەلەک ئالۆز بیت.
