ئەمریکا: هەڤدیتنا ئەڤرۆ دووماهی شانسە بۆ ئیرانێ
نوونەرێ ئەمریکا بۆ دانوستاندنێن ل گەل ئیرانێ دیار کر، هەڤدیتنا ئەڤرۆکە یا ل گەل ئیرانێ دووماهی شانسە بۆ وی وەلاتی و دڤێت ئیران خوە ئێکلا بکەت و دەست ژ بەرنامێ خوە یێ ئەتۆمی بەردەت، چونکی وەکو ئەمریکا ئەو ب چو رەنگەکێ رازی نابن ئیران دەمی بۆ بەرژەوەندیێن خوە بکار بینیت و ئالۆزیان دروست بکەت، بەلکو دڤێت ئیران بەرنامێ خوە یێ ئەتۆمی ب تەمامی هلوەشینیت، هەکە ئەو یەک نەهێتە کرن ئەمریکا دێ رێیێن دی ل دژی ئیرانێ بکار ئینیت.
ل ئالیێ دی دوهی عەباس ئیراقچی وەزیرێ دەرڤە یێ ئیرانێ ژی دیار کر، هەلوەستێ ئەمریکا خزمەتا رێککەفتنێ ناکەت، دڤێت ئەمریکا رێزێ ل ئیرادا گەلێ ئیرانێ بگریت و دەست ژ گەفکرنێ بەردەت، هندەک ژ بەرپرسێن ئەمریکا کەفتینە ژێر کاریگەریا سیاسەتا ئسرائیلێ و دخوازن رەوشا رۆژهەلاتا ناڤین ئالۆز بکەن، لێ ئیرانێ دڤێت پرسێن هەی ب رێیا دانوستاندنان چارەسەر بکەت.
