ئەمریکا ژ هەلوەستێ ئسرائیلێ رازی نینە
دەزگەهێن راگەهاندنا ئەمریکا دیار دکەن، سەرۆکێ وی وەلاتی ب رێیا تەلەفونێ چەندین جاران ل گەل بنیامین نەتانیاهۆی ئاخڤیە و داخواز ژێ کریە شەرێ نها بدەتە راگرتن و رێ بدەت دا هاریکاریێن مرۆڤی بگەهنە دەستێ خەلکێ سڤیل ل غەزە، لێ هەتا نها ژی سەرۆک وەزیرێن ئسرائیلێ یێ رازی نینە و رژدە دڤێت شەرێ ل دژی حەماسێ ب توندی بەردەوام بیت، ئەو یەک ژی بوویە جهێ دلگرانیا سەرۆکێ ئەمریکا و ژ بەر ڤێ یەکی ژی حەفتیەکە ئەو چەکێ کو پێدڤی بوو ئەمریکا بۆ ئسرائیل رەوانە بکەت نەهاتیە هنارتن و ئەمریکا ب توندی ل دژی شەریە و دخوازیت شەر بهێتە راگرتن.
ئەو یەک د دەمەکێ دایە بەری چەند رۆژان وەزیرێ دەرڤە یێ ئەمریکا ژی راگەهاند، سەرۆک بایدن پشتەڤانیێ ل پرۆژێ دو دەولەتێن جودا ژ بۆ ئسرائیل و فەلەستینێ دکەت، چونکی دێ وەسا پرسا هەر دو ئالیان هێتە چارەسەر کرن، لێ مخابن سەرۆک وەزیرێن ئسرائیلێ ل سەر هەلوەستێ خوە بۆ بەرفرەهکرنا شەری یێ رژدە و ئەو یەک دێ ئەنجامێن خوە یێن خراب هەبن.
