ئەمریکا ھەڤال و دوژمنێ دەمدرێژ نینە
ئەڤرۆنیوز، سەباح زێباری:
سامی رێکانی شروڤەکارێ سیاسی بۆ ئەڤرۆ نیوز ددەتە دیار کرن کو ئەمریکا ھەمی گاڤا ڤیایە کو ھێزێن خوە ل وان جھا بکاربینیت کو مەرەم و بەرژەوەندی ھەبن، ئەڤە ھەر ژ کەڤندا ستراتیژیەتا ئەمریکا بوویە، ھەروەسا ھندەک لایەنێن دی بووینە ئەگەر کو مەترسی ل سەر بەرژەوەندیێن ئەمریکا پەیدا بن ل دەڤەرێ دا، ئەڤ تشتە ژی ب رێککەفتن و دانوستاندن یێ ھاتیەکرن، ئەڤە بەرنامە و ستراتیژیەتا ئەمریکایە.
ناڤھاتی زێدەتر گۆت کو ئەمریکا شەری بۆ کەسێ ناکەت ئەگەر نەبینیت مفایێ وێ پترە ژ زیانێ و ئەمریکا ب کارنامێ کار دکەت، ئەو کارنامە ژی وەکی گرێبەستەکێ یە، د ناڤبەرا وێ و مللەتێ وێ دا، ئەوان چ گۆتی یە بۆ خەلکی ل دووڤ وێ چەندێ دچن، تایبەت پتر ل سەر سەنگێ بھێزبوونا ئابووری کار دکەت، ئەڤ بریارا نھا ژی دایی ژ چارچوڤێ قانوونێ نەدەرکەفتی یە، مەبەستا ئەمریکا ژی پتر شەرەکێ بازرگانی یە، کو ستراتیژیەتا ئەمریکا دەولەت فێری ڤێ چەندێ کرینە، لەوما ئەمریکا ھەڤال و دوژمنێن دەمدرێژ نینە و ل دووڤ گوھۆرینێن روژانە دچیت.
سامی رێکانی زێدەتر خوەیا کر کو ئەڤ بریارا ئەمریکا ژی پشتی چەند دانوستاندن و رێککەفتنا ھاتیە کرن، دناڤبەرا ترامپی و ئەردۆگانی دا و نە دوورە رێککەفتن دگەل ھندەک لایەنێن دی ھاتبیتەکرن.
