ئەمریکـا هێزێن زێدەتر رەوانـەی رۆژئاڤـایێ کـوردستانێ دکـەت
فەرماندارەکێ هێزێن سووریا دیموکرات دیار کریە، د چەند رۆژێن بۆری دا ب سەدان سەربازێن ئەمریکی ل گەل چەکێن گران ل دەڤەرێن جودا جودا یێن رۆژئاڤایێ کوردستانێ هاتینە بجهکرن و چاڤدێرەکی سیاسی ژی دیار دکەت، هەبوونا هێزێن ئەمریکا د رەوشا نها یا ئالۆز دا د بەرژەوەندیا کوردێن رۆژئاڤایێ کوردستانێ دایە.
فەرماندارەکێ هێزێن سووریا دیموکرات دیار کریە، د چەند رۆژێن بۆری دا ب سەدان سەربازێن ئەمریکی ل گەل چەکێن گران ل دەڤەرێن جودا جودا یێن رۆژئاڤایێ کوردستانێ بجهـ بووینە و ئەمریکا بەردەوام سەرباز و چەکان دئینتە رۆژئاڤایێ کوردستانێ، هەتا نها بەرپرسێن ئەمریکی ل دۆر هاتنا هێزێن نوو چو داخۆیانی نەداینە، لێ پشتی ئێرشێن هێزێن سەر ب ئیرانێ ل دەڤەرێن جودا جودا یێن سووریێ، ئەمریکا ژی بریارەکا وەسا دایە و نها هێزێن ئەمریکا ل هەموو دەڤەرێن سووریێ د ئامادەباشیێ دانە.
هەمان فەرمانداری کو ناڤێ وی نەهاتیە ئاشکرا کرن ئەو یەک ژی دیار کریە، هاتنا وان هێزان بۆ رۆژئاڤایێ کوردستانێ د رەوشا نها یا ئالۆز دا کارەکێ باشە، چونکی مە پێ باشە هێزێن ئەمریکا ل دەڤەرێن هەستیار یێن رۆژئاڤایێ کوردستانێ دا بجهـ ببن، چونکی وی دەمی دێ رێگری ل ئێرشێن تورکیا ژی هێنە کرن، لێ هەتا نها بەرپرسێن ئەمریکی ل دۆر هاتنا هێزێن نوو بۆ رۆژئاڤایێ کوردستانێ چو داخۆیانیەکی نەداینە، لێ هاتنا هێزێن ئەمریکا بەردەوامە و دبیت ئەمریکا هندەک بنگەهێن نوو یێن سەربازی ژی ل دەڤەرێن ستراتیژی ل رۆژئاڤایێ کوردستانێ دروست بکەت.
د ڤێ دەربارێ دا محەمەد عەزیز چاڤدێرێ سیاسی یێ رۆژئاڤایێ کوردستانێ ژی دیار کر، نها رەوشەکا گەلەک ئالۆز ل رۆژهەلاتا ناڤین یا هەی، ب تایبەتی ژی پشتی شەرێ د ناڤبەرا ئسرائیلێ و حەماسێ دا دهێتە چاڤەرێکرن کو گوهۆڕینێن بلەز ل دەڤەرێ روو بدەن، بێگومان هەر وەلاتەکێ ژی دڤێت ل گۆر بەرژەوەندیێن خوە گوهۆڕین روو بدەن، ئانکۆ هەر وەلاتەک د ئامادەباشیێ دایە، هێزێن سەر ب ئیرانێ ژی چەند رۆژن ل سووریێ ئێرشی بنگەهێن سەربازی یێن ئەمریکا دکەن، ئەمریکا ژی بەری چەند رۆژان ب توندی بەرسڤا وان هێزان دا، ژ بەر ڤێ یەکێ ژی دیارە ئەمریکا دڤێت پێگەهێ خوە ل باکورێ سووریێ بهێزتر بکەت.
ناڤهاتی ئەو یەک ژی دیار کر، هەبوونا هێزێن ئەمریکا ل رۆژئاڤایێ کوردستانێ بۆ کوردێن سووریێ گەلەک باشە، چونکی دەمێ رەوش ئالۆز بیت هەم تورکیا و هەم ژی رژێما سووریێ دێ بزاڤا هندێ کەن دا ئێرشی رۆژئاڤایێ کوردستانێ بکەن، لێ دەمێ هێزێن ئەمریکا ل رۆژئاڤایێ کوردستانێ بن ئەو نەشێن ب ساناهی ئێرشی کوردان بکەن، ژ بەر ڤێ یەکێ ژی هاتنا هێزێن ئەمریکی ل گەل چەکێن گران بۆ پاراستنا رۆژئاڤایێ کوردستانێ ژ هەر ئێرشەکێ دێ یا باش بیت.
