ئەم بزاڤێ دكەین دەنگێ بێدەنگان بگەهینین
عایشا عەجیب:
ناسر عەلی، رێڤەبەرێ نڤیسینگەها كەنالێ رووداو ل دهۆكێ، د دیدارەكێ دا بۆ رۆژنامەیا ئەڤرۆ گۆت: ئەڤە بیست سالن ئەز كارێ پەیامنێریێ دكەم و كارێ هەردەم ئەز شانازیێ پێ دبەم بەرنامەیێ (دەمێ دهۆكێ) یە كو ژ سالا (2016) وەرە هەتا نوكە حەفتیێ جارەكێ دهێتە پێشكێشكرن و ئێكە ژ بەرنامەیێن پر بینەرترین مرۆڤ ل كەنالێ رووداو هەین هەین و ئەم بزاڤێ دكەین دەنگێ بێدەنگان بگەهینین.
هەروەسا گۆت: بەرنامەیێ ناڤبری كار ل سەر زێدەتر ژ (100) ئاریشەیێن پارێزگەها دهۆكێ ژ سەنتەرێ پارێزگەهێ هەتا دگەهیتە هەموو قەزا وناحیا و كۆمەلگەها و گوندان كریە، هەروەسا ژ باژێرێ مووسل و رۆژئاڤایێ كوردستانێ ژی پشكداربووینە و پشتی مە دەنگێ وان گەهاندیا لایەنێن پەیوەندیدار هاتینە چارەسەركرن، بۆ زانین دەمێ د خەلەكا ئێكێ دا بابەتێ (دۆمبەلێ) ئازراندی پشتی دو دەمژمێران بابەت هاتە چارەسەركرن و گەلەك جاران د حەفتیەكێ دا پتری دەه بابەتان دگەهنە بەرنامەی، لێ ژبەر نەبوونا دەمی بزاڤان دكەین ل رادیۆ و تۆرێن جڤاكی بەلاڤ بكەین، هەروەسا د پلانا مە دایە ل دەمێ بهێت هندەك گوهۆڕینێن مەزن د بەرنامەی دا بكەین.
