ئەم دژى دەرکرنا قانوونا بارێ شارستانیا ئیراقێ نە
هه‌ولێر، قائید میرۆ:
حه‌فتیا بۆری په‌رله‌مانێ ئێراقێ قانوونا بارێ شارستانی په‌سه‌ندكر، په‌رله‌مانتاره‌كا كورد ژی دیار کر کو هه‌رێما كوردستانێ یا پێگیر نابیت ب ئه‌ڤێ قانوونێ، به‌لێ دێ زیان بۆ ئافره‌تا ئێراقی هەبیت، ژبەرکو نوكه كچ دشێت د ژییەکێ زۆر بچووكدا هەڤژینیێ پێک بینیت.
كوردۆ عومه‌ر، ئه‌نداما په‌رله‌مانێ ئێراقێ د دیدارەکێ دا بۆ رۆژنامەیا ئه‌ڤرۆ دیار كر کو قانوونا بارێ شارستانی ئه‌ڤا ل حه‌فتیا بۆری ژلایێ په‌رله‌مانێ عێراقێ هاتیه په‌سه‌ندكرن، رێكارێن ئه‌ڤێ قانوونێ به‌رۆڤاژی په‌یره‌وێ ناڤخۆیێ په‌رله‌مانی بوون، چونكه ئه‌و پڕۆژه قانوون ژلایێ وه‌قفا شیعی هاتبوو به‌رهه‌ڤكرن و ژ پێنجی مادده‌یان پێكهاتبوو، به‌لێ نه‌چوویه لیژنا قانوونی و دناڤا په‌رله‌مانی ژیدا نه‌هاتیه خواندن.
کوردۆیێ ئەو چەندە ژی دیار کر کو ئه‌و رۆژا پڕۆژه قانوون هاتیه په‌سه‌ندكرن رێژا قانوونی یا په‌رله‌مانتاران به‌رهه‌ڤی كۆمبوونێ نه‌بوون، واته بشێوه‌یه‌كێ گشتی ده‌ربازكرنا وێ قانوونێ یا سرۆشتی نه‌بوو، به‌لێ ئه‌و قانوونە ل هه‌رێما كوردستانێ ناهێته جێبه‌جێكرن و هه‌رێم پێگیریێ پێ ناكه‌ت و گۆت؛ چونكه مه قانوونا خۆ هه‌یه و پرۆسا هه‌ڤژینیێ لسه‌ر بنه‌مایێ قانوونا هه‌رێما كوردستانێ دێ بڕێڤه چیت نه‌ك ئه‌و قانوونا حه‌فتیا بۆری شیعه‌یان په‌سه‌ند كری ل په‌رله‌مانێ ئێراقێ،.
ئەنداما پەرلەمانێ ئێراقێ د بەرەوامیا ئاخفتنێن خۆدا دیار کر، ئه‌ڤێ قانوونێ دێ كاریگه‌ریێن زۆر خراب و نه‌رێنی لسه‌ر جڤاكێ ئیراقێ هه‌بن و زیانێن زۆر بۆ ئافره‌تا عیراقی هه‌نه، بتایبه‌تی ئه‌ڤێن مه‌زهه‌بێ وان شیعه و ل ناڤه‌ڕاست و باشوورێ ئێراقێ دێ بنه قوربانی ئه‌ڤێ قانوونێ و پشتی چه‌ندین سالێن دی دێ كاریگه‌ریێن وێ ده‌ركه‌ڤن.
كوردۆ عومه‌ر دیار کر ژی، مخابن قانوونا بارێ شارستانی یا سالا 1959 زۆر باشتر بوو ژ ئه‌ڤا نوكه هاتیه ده‌ركرن، چونكه قانوونا به‌رێ ژلایێ كه‌سێن بسپۆر و زانا هاتبوو دانان، مخابن پشتی ده‌ربازبوونا چه‌ندین سالان ئیراق پاشڤه زڤری و قانوونه‌كا پاشكه‌فتی ده‌ركر و گۆت؛ راسته هه‌رێما كوردستانێ ڤه‌ناگریت، به‌لێ زۆلم ل ئافره‌تێن دەڤەرێن دی یێن عیراقێ دهێته‌كرن.
كوردۆ عومه‌ر، ئه‌نداما په‌رله‌مانێ ئێراقێ گۆتژی؛ ژبه‌ركو هه‌ڤژینی پرۆسه‌یه‌كا پیرۆز و گرنگه و به‌رپرسیاریه‌تی تێدا هه‌یه، دەمێ كچه‌ك د ته‌مه‌نه‌كێ زوودا بچیته به‌ر مال و مێرا دێ چاره‌نڤیس و پاشه‌ڕۆژا وێ ره‌ش بیت، له‌وڕا ئه‌م دگه‌ل ده‌ركرنا ئه‌ڤێ قانوونێ نه‌بووینه و هژماره‌كا زۆر یا په‌رله‌مانتاران ژی دژی ئه‌ڤێ قانوونێ بوون.
