ئەم دێ چەندین پڕۆژەیان ل پارێزگەها دهۆكێ ئەنجام دەین
ئەڤرۆ، زنار تۆڤی:
دوهی سێشەمبی، ب بەرهەڤبوونا قونسلێ گستی یێ وەلاتێ فرەنسا ب وەكالەت ل هەرێما كوردستانێ، و دەڤەردارێ دهۆكێ، رێڤەبەرێ گشتی یێ پەروەردێ ل پارێزگەها دهۆكێ، دوهی 25/7/2023 قۆتابخانەكا بنەرەتی یا 12 رێزی ل تاخێ ئێتیتێ هاتە ڤەكرن، كو ژ لایێ رێكخراوا مێشن یا فرەنسی ڤە هاتیە ئاڤاكرن.
رودولف ریشار، قونسلێ گشتی یێ فرەنسا ب وەكالەت ل هەرێما كوردستانێ، بۆ رۆژناما ئەڤرۆ دیار كر، حوكمەتا هەرێما كوردستانێ شیانێن مەزن دمەزێخیت، بۆ دابینكرنا قۆتابخانان و بەرهەڤكرنا زانستەكێ باش بۆ زارۆكێن هەرێما كوردستانێ و بۆ وان ئاوارە و پەنابەرێن ل كوردستانێ ژی دخوینن و گۆت: «مە ژی دڤیا د ڤی بیاڤی دا هەڤكاریا حوكمەتا هەرێمێ بكەین ب ئاڤاكرنا ڤێ قوتابخانا 12 رێزی ل سەنتەرێ دهۆكێ، كو دێ خزمەتا زارۆیێن ڤی باژێری كەت».
گۆتژی: «ئەم وەكو حوكمەتا فرەنسا دێ هەموو شیانێن خوە ئێخینە كار، داكو هاریكاریا حوكمەتا هەرێما كوردستانێ، د هەموو كەرتان دا بكەین، هەروەسا ل پاشەرۆژێ ژی ئەم دێ پشتەڤانیێ ل حوكمەتا هەرێما كوردستانێ كەین، ب تایبەتی ژی د كەرتێ پەروەردێ دا و مە ل بەرە چەندین پڕۆژەیێن دی ژی ل پارێزگەها دهۆكێ ئەنجام بدەین».
