ئەم كار بۆ نەهێلانا دیاردەیا توندوتیژیێ و هشیاركرنا جڤاكی دكەین
هەولێر، قائید میرۆ:
سەرۆكێ حوكمەتا هەرێما كوردستانێ گرنگیەكا زۆر ب ئەڤێ هەوێ ددەت
زیبا تەها، سكرتێرا ئێكەتیا ئافرەتێن كوردستانێ بۆ رۆژناما ئەڤرۆ دیار كر، هەر سال 25 هەیڤا نۆڤبەر حەفتیا بەرهنگاربوونا توندۆتیژیێ دژی ژنان ل سەرانسەری جیهانێ بڕێڤە دچیت و بۆ دەمێ 16 رۆژان یا بەردەوامە و گۆت: (ل هەرێما كوردستانێ ژی چەندین چالاكی ڤێ هەلكەفتێ دهێنە گێران ب مەرەما هشیاركرنا جڤاكی، ژلایەكێ دیڤە سەرۆكێ حوكمەتا هەرێما كوردستانێ “مەسروور بارزانی” گرنگیەكا زۆر ب ئەڤێ هەوێ ددەت و بەردەوام تەكەزیێ لسەر نەهێلانا توندۆتیژیێ دكەت).
د هەموو جڤاكاندا توندۆتیژی دژی ژنان دهێتە كرن
زیبایێ دیار كر ژی، توندۆتیژی یا گرێدایی جڤاكەكی نینە، بەرۆڤاژی ل هەموو جیهانێ توندۆتیژی ب رێژەیێن جودا هەیە و سالانە دهێتە تۆماركرن، واتە د هەموو جڤاكاندا توندۆتیژی دژی ژنان دهێتە كرن و دیرۆكەكا زۆر كەڤن هەیە و گۆت: (بەلێ هەر جڤاكەكی ژی ئەگەرێن خۆ هەنە بۆ ئەنجامدانا توندۆتیژیێ).
مەرەم ژ ساخكرنا هەوا بەرهنگاربوونا توندۆتیژیێ هشیاركرنا جڤاكییە
سكرتێرا ئێكەتیا ئافرەتێن كوردستانێ دا زانین كو حوكمەتا هەرێما كوردستانێ چەندین دەزگەهێن تایبەت دامەزراندینە بۆ رێگریێ ل توندۆتیژیێ و كێمكرنا توندۆتیژیێ دژی ژنان و گۆت: (مەرەم ژ ساخكرنا هەوا بەرهنگاربوونا توندۆتیژیێ ل هەرێما كوردستانێ ئەوە جڤاك بهێتە هشیاركرن لدۆر توندۆتیژیێ و ئاستێ جڤاكی و تاكەكەسی بهێتە بلندكرن و كاریگەریێن نەرێنی و مەترسیێن توندۆتیژیێ دهێنە بەحسكرن).
رۆژانە ژن دبنە قوربانی ئەنجامدانا توندۆتیژیێ ب بەهانەیێن جودا
زیبایێ دبەردەوامیا ئاخفتنێن خۆدا دیار كر، توندۆتیژی دیاردەیەكا هۆڤانەیە ل دژی هەر كەسەكی بهێتەكرن چ ژن بیت یان زەلام، ئەم هەموو دزانین توندۆتیژی كریارەكا مەترسیدارە بۆ سەر مرۆڤان و ئەنجامێن وێژی هەر كارەسات و مالوێرانیە بۆ مرۆڤی و جڤاكی و گۆت: (مخابن رۆژانە ژن دبنە قوربانی ئەنجامدانا توندۆتیژیێ ب بەهانەیێن جودا ئەڤرۆ ژن یا دهێتە كوشتن و ئەشكەنجەدان).
ئەم گرنگیێ ب حالەتێن توندۆتیژیێ و چارەسەركرنا ئاریشەیان ددەین
سكرتێرا ئێكەتیا ئافرەتێن كوردستانێ دیار كر، هۆكارێن توندۆتیژیێ زۆرن و بەهرا پتر ئافرەت یا دبیتە قوربانی، لەوما ئێكەتیا ئافرەتێن كوردستانێ گرنگیەكا زۆر ب توندۆتیژیێ و چارەسەركرنا ئاریشەیان ددەت، بەرهنگاربوونا توندۆتیژیێ ئێكە ژ بەرنامە و پلانێن ئێكەتیا ئافرەتێن كوردستانێ و گۆت: (نەك بتنێ د حەفتیەكێ دا بەرۆڤاژی بەردەوام ئەم كار دكەین بۆ نەهێلانا توندۆتیژیێ و هەموو بزاڤەك دهێتەكرن بۆ هشیاركرنا ژنان، داكو توندۆتیژیێ قەبوول نەكەت).
ل دەمێ توندۆتیژی دژی ژنێ دهێتەكرن باشترە پەنایێ بۆ قانوونێ ببەت
زیبایێ د بەردەوامیا ئاخفتنێن خۆدا گۆت: (داخوازێ ژ ژنان دكەین ل دەمێ توندۆتیژی دژی وان دهێتەكرن بلا رێكێن قانوونی بگرنە بەر و ب رێیا قانوونێ ئاریشەیێن خۆ چارەسەر بكەن، ئەمژی ل ئێكەتیا ئافرەتێن كوردستانێ پشتەڤانیا وان ژنان دكەین یێن توندۆتیژی دژی وان دهێتەكرن و ب هەموو شیانێن خۆ دێ د هاریكار بین).
بزاڤێ دكەین ژن و زەلام وەك
مرۆڤ د یەكسان بن
ل دووماهیێ زیبا تەها سكرتێرا ئێكەتیا ئافرەتێن كوردستانێ گۆت: (دەرگەهێ ناڤەندێن ئێكەتیا ئافرەتان ل هەمبەر ژنان د ڤەكرینە و چو جارەكێ مە نەڤیایە ئاریشە هەبن، ئەم دخوازین ژن و زەلام وەكی دوو مرۆڤ د یەكسان بن و مافێن هەردوكا نەهێنە بن پێكرن).
