ئەم هیڤیدارین فرەنسا پتر پڕۆژەیان ل شنگالێ پێشكێش بكەت
دهوك، لەزگین جوقی:
میر حازم تەحسین بەگ، میرێ ئێزدیان ل كوردستان و ئیراق و جیهانێ و سەرۆكێ جڤاتا رۆحانیا ئێزدیان، ل گەل پاتریك دۆریل بالیۆزێ فرەنسا ل ئیراقێ و برایم قونسۆلێ گشتی یێ فرەنسا ل هەولێرێ بەحس ل پشتەڤانیا گەلێ فرەنسا بۆ جڤاكا ئێزدی و دۆزا وان هاتە كرن هەر ژ رۆژا ئێكێ یا جینۆسایدا ئێزدیان ل شنگالێ و دبێژیت: فرەنسا د گەلەك پرسان دا ل گەل مە هاریكاربوویە.
میری دیار ژی كر، فرەنسا بو وان گرنگە و دخوازن پەیوەندیێن باش بەردەوام بن، نوكە گەلەك ئێزدی ل فرەنسا هەنە وان داخواز كر كو گرنگی ب وان و پرسێن وان یێن جودا بهێتە دان و گۆت: «مە دڤێت نیشا وان بدەین كا چ ب دەستێ رێكخراوا داعشا تیرۆرست هاتیە كرن، مە ب هزاران ژ گەنج و زەلام و ژنان وندا كرن، زێدەباری رەڤاندنا هزاران ژن و زارۆكان، كو هێشتا چارەنڤیسێ هندەكان ژ وان نەدیارە».
گۆتژی: «ئەم داخوازین مافێن مە د یاسا و دەستووران دا بهێنەدان و پشتگیریا مە بهێتە كرن ل سەر ئاستێ هەرێمی و نێڤدەولەتی، دیسا ل سەر بنگەهێ وەلاتیبوونێ رەفتار ل گەل مە ناهێتە كرن، ب تایبەتی د دانانا یاسا و رێنمایێن كو ژ لایێ دەزگەهێن یاسادانانێ ڤە دەردكەڤن».
میرێ ئێزدیان خویا ژی كر، دەولەتا فرەنسا گەلەك پڕۆژە ل شنگالێ پێشكێش كرینە و گۆت: «ئەم هیڤیدارین پتر پڕۆژە بهێنە بجهئینان، داكو ژێرخانا شنگالێ باشتر ببیت و دۆسیەیا ئاوارەبوونێ بهێتە گرتن و ئاوارە ب سەربلندی ڤەگەڕنە مالێن خۆ».
