ئەم ژ كەسێ قەبوول ناكەین بەحسێ گوهۆڕینا ناسنامـەیا مە یا كوردی بكەت
دهۆك، لەزگین جۆقی:
رێڤەبەری كاروبارێن ئێزدیان ل دهۆكێ دیار كر، بزاڤكرن بۆ گوهۆڕینا ناسنامەیا نەتەوەی یا ئێزدیان، د دیرۆكا ئیراقێ دا تشتەكی نوو نینە و گوهۆڕینا ناسنامەیا نەتەوەی یا ئێزدیان ئێك ژ پلانێن سەرەكی یێن سەردەمێ رژێما ژناڤچوویی یا ئیراقێ بوو.
جەعفەر سمۆ، رێڤەبەرێ كاروبارێن ئێزدیان بۆ ئەڤرۆ گۆت: «ئەڤ پیلانە ژ بۆ كێمكرنا پێگەهێ كوردان بوویە، هەر جارا نەحەزێن كوردستانێ ڤیان دربا خۆ ل كوردان بدەن، پێكهاتەكی ب كار دئینن، لێ دیرۆك و ناسناما مە یا كوردی یە و ژ كەسێ ناهێتە قەبوولكرن، بەحسێ گوهۆڕینا ناسناما مە یا كوردی بكەت».
شێخ زێدو باعەدری، كەساتیێ ئێزدی بۆ ئەڤرۆ دیار كر، بزاڤێن گوهۆڕین و بەرزەكرنا ناسنامەیا ئێزدیان ل ئیراقێ ژ لایێ هندەك كەسێن شوڤێنی ڤە دهێتە كرن، ئەڤە د دەمەكی دایە، كو هێشتا ئێزدی ژ بەر جینۆسایدا شنگالێ دنالن و ل جهێ كار بۆ جینۆسایدا ئێزدیان بهێتە كرن، مخابن بەروڤاژی كار دهێتە كرن بۆ بەرزەكرنا ئێزدیان، ل پەرلەمانێ ئیراقێ پەرلەمانتارێن عەرەب 182 ئیمزا كۆمكرینە، داكو قەومیا ئێزدیان بێخنە دەنگدانێ، ئەم وەكو ئێزدی ڤی كارێ مەترسیدار رەت دكەین و شەرمزار دكەین، ژ بەركو ئەڤ كارە بەردەوامی دانە ب جینۆسایدكرنا مللەتێ ئێزدی.
