ئەنجامێن قۆناغا ئێكێ بووینە جهێ دلگرانیێ
فیدراسیۆنا باسكێت بۆلا ئیراقێ خشتەیێ گشتی یا رێزبەندییاخولا پلا نایابا ئیراقێ بۆ قۆناغا ئێكێ راگەهاند، تێدا یانەیا دیفاع ئەلجەوی ئەوا دو یاریزانێن كورد بۆ دكەن ژ وانا ئێكێ كوڕێ پارێزگەها دهۆكێ فەرید رەعدی كو شیاینە 19 خالان كۆمبكەن و سەرێ لیستا خولێ بهێن ژ10 یارییان نەهـ سەركەفتنان بینن، لێ د بەرانبەردا نوونەرا كوردستانێ ئەو ئاست وئەنجامێن ژێ هاتییە چاڤەڕێكرن نە هاتە دیتن.
ل دووڤ لیستەیا هاتییە بەلاڤكرن، دیفاع ئەلجەوی 19 خالان سەرێ لیستێ دهێت، كەرخ ب هەمان خالان رێزا دویێ، نەفت، شورتە، ب18و 17 خالان رێزێن سێیێ و چارێ دهێن، هەر ئێك ژ حللە، دیجلە ئەلجامعە و حەشد ئەلشەعبی ب15 خالان رێزێن پێنجێ هەتا شەشێ، كارەبا، غازئەلشیمال و زاخۆ هەرئێك ب14 خالان رێزێن حەفتێ هەتا نەهێ و یانەیا نەفت ئەلشیمال ب11 خالان رێزا دەهێ دهێت، بۆ زانین ئەو تیما ب سەركەڤیت ب دو خالانە و یا خوسارەت ب ئێك خالە.
ل دووڤ داخویانییا سەرپەرستێ تیما باسكێت بۆلا یانەیا زاخۆ عەبدولستار عەلی بۆ رۆژنامەیا ئەڤرۆ دیار كربوو ئەو ژ ئاستێ یاریزانێن خوە د رازی نینن تایبەت پیشەكارێن خوە یێن ئەمریكی ئەوا دهاتە چاڤەڕێكرن د ناڤ خولێ دا نە هاتییە دیتن وخەلەتیێن تاكە كەسی دهاتنە كرن تایبەت دووماهی یاری دا بەرانبەر نەفت و دیار كربوو ئەو دێ رێكێن چارەسەریێ گەڕیێن و نا هێتە قەبوولكرن ئەڤ ئاست و ئەنجامە د بەردەوامبن، هەروەسان دیار كربوو ئەو د دەستنیشانكرنا یاریزانان دا سەركەفتی نەبوون و هەمی بزاڤ دێ هێنە كرن ژبۆ چارەسەركرنا ئەڤان كێماتییان.
