ئەندازیارێ سەرپەرشتێ پرۆژەی: بزاڤێ دکەین ھەر ب وی پارەی ئەندەرپاسەکێ ل نێزیک پانزینخانا بناڤی ژی دروست بکەن
ئەڤرۆ، نیوار محەمەد سەلیم:
ئەندازیار نەمر مایی، سەرپەرشتێ پرۆژەی راگەھاند کو نھا کار ل سەر چێکرنا ئەندەرپاسا نێزیک مزگەفتا شەھیدان نھا ب رێژا ٩٥% ب دووماھی ھاتیە، مە ل بەرە بەری جەژنا نەورۆزێ دێ ب دووماھی ھێت و کەڤیتە د خزمەتا وەلاتیان دا و ئاشکەرا ژی کر کو نەخشێ ئەندەرپاسا ل نێزیک قوتابخانا سەفین ھاتیە گوھۆڕین و دا زانین کو ئەو بزاڤێ دکەن ھەر ب وی پارەی ئەندەرپاسەکێ ل نێزیک پانزینخانا بناڤی ژی دروست بکەن و گۆت: “بۆ ڤێ چەندێ مە گەلەک گوھۆڕین د نەخشەیان و سیستەمێ کاری دا کریە و شیاینە ٢٤ ملیار دیناران ژ خوە پاشکەفت بکەین”.
ئەندازیار نەمر مایی، سەرپەرشتێ پرۆژەی بۆ رۆژناما ئەڤرۆ گۆت: “پرۆژێ چێکرنا ئەندەرپاسا نێزیک مزگەفتا شەھیدان نھا ب رێژا ٩٥% ب دووماھی ھاتیە، مە ل بەرە بەری جەژنا نەورۆزێ دێ ب دووماھی ھێت و کەڤیتە د خزمەتا وەلاتیان دا”.
زێدەتر گۆت: “نھا گرێردەرێن دووماھیێ ژی ل کارگەھا شێخان یێن ھاتینە چێکرن و مە ل بەرە ل د ڤان چەند رۆژێن کێم دا ھەموو دێ گەھنە سەر پرۆژەی و کار یێ بەردەوامە”.
دەربارەی قووناغێت کونکرتیکرنێ ژی کو نھا کار تێدا دھێتە کرن گۆت: “ئەڤێ ئەندەر پاسێ نەە بان یێن ھەین و ھەتا نھا مە سێ یێن کونکریت کرین و ئەم د بەردەوامن و ب ھیڤی نە ل دەمەکێ نێزیک ئەو ژی ب دووماھی بھێن”.
پێشتر رێ ھاتبوونە ڤەکرن و پاشان ژی گرتن، ل دەمێ گرتین، راگەھاند کو ب تنێ دێ بۆ ماوێ دو ھەیڤان ھێنە گرتن، بەلێ ئەڤ دەمە درێژ بوو، ھوون ئەگەران بۆ چ د ڤەگەرینن؟ د وێ دەربارێ دا ئەندازیار نەمر گۆت: “ئەڤ وەرزێ ئەم کەفتینە تێدا کارکرن تێدا یا ب زەحمەتە، سەرما و بارانن و ل وەرزێ زڤستانێ کونتکریت زوو ھشک نابیت، ھەر چەندە چەندین ماددێن کیمیاوی بۆ ڤێ مەرەمێ مە یێن کرینە د ناڤ دا، بەلێ سۆپاس بۆ خودێ کارێ چێکرنا گێردەران ب دووماھی ھاتیە و ئێدی کار ب ساناھیترە”.
د بەردەوامیا روونکرنا خوە دا گۆتژی: “ژ بەر کو ھەرسێ پرۆژە ل سەر جاددا بارزان بوون، مە نەخواست ھەرسێیان پێکڤە کار تێدا بکەن دا قەرەبالغ گەلەک کەڤیتە سەر جاددێ و وەلاتی دا گەلەک بێزار بن”.
گەلەک دەنگۆ یێن ھەین کو ئاریشێن پارەی بووینە رێگر کو ھەتا نھا پرۆژێ ئەندەر پاسا ل نێزیک قوتابخانا سەفین یێ وەسایە و کار ل سەر نەھاتیە کرن، سەرپەرشتێ پرۆژەی ئەڤ چەندە رەتکر و گۆت: “نەخێر، پارێ ھەموو پرۆژەی پێکڤە ژ لایێ وەزارەتا باژێرڤانیان ڤە ھاتیە دابینکرن و ئاریشێن نەبوونا بوودجەی نەبووینە”.
دەربارەی دەمێ ڤەکرنا پرۆژێ ئەندەرپاسا نێزیک مزگەفتا شەھیدان، سەرپەرشتێ پرۆژەی گۆت: “ئەم پێشبینی دکەین ھەتا ١٥ ئادارێ پرۆژێ ئەندەرپاسا مزگەفتا شەھیدان ب دووماھی بینین و دێ دەست ب بەرھەڤیێن خوە کەین بۆ پرۆژێ نێزیک قوتابخانا سەفین. ئەو پرۆژە گەلەک ڤەناکێشیت چو ل ھەیڤا ئادارێ یان نیسانێ دەست ب پرۆژەی بکەین پێشبینی دکەین چار ھەتا پێنج ھەیڤان ب دووماھی بینین”.
ل دۆر وێ چەندێ ژی کا بۆچی ل دەمێ پرۆژێ ئەندەرپاسا نێزیک فەرماندێ بەر ب دووماھیێ ڤە چوویی، ل ئەندەرپاسا ل نێزیک مزگەفتا شەھیدان دەست ب یا نوو ھاتە کرن، نھا ئەڤە بەر ب دووماھیێ ڤە چوویە و دەست ب یا نێزیک قوتابخانا سەفین ناھێتە کرن؟ ئەندازیار نەمر مایی گۆت: “دەما مە دەست ب پرۆژی ئەندەرپاسان نێزیک مزگەفتا شەھیدان کری، ل وی دەمی ئەندەرپاسا نێزیک فەرماندێ ب روویێ وەلاتیان دا ھاتبوو ڤەکرن، ھەر چەندە ئەڤە ژی ب رێژەکا باش ب روویێ وەلاتیان دا ھاتیە ڤەکرن، بەلێ دبیت کۆمپانیێ ھندەک ئاریشێن دارایی ھەبن، بەلێ ب رەنگەکێ گشتی ھێشتا ماوێ پرۆژی گەلەک یێ مایی”. گۆتژی: نێزیکی نیڤا وی ماوێ ھاتیە دەست نیشانکرن یێ ل بەر دەستێ کۆمپانیێ مایی. د ڤی ماوەیی دا کۆمپانی دشێت پرۆژەی ب دووماھی بینیت”.
ل دۆر وێ چەندێ کا ژبلی ئاریشێن دارایی یێن کۆمپانیێ ئاریشێن مولکی ل وی جھی ماینە، ئەندازیار نەمر دا زانین کو چو ئاریشێن مولکی ل سەر وی پرۆژەی نەماینە و گۆت: “مە ھندەک گوھۆڕین یێ ل نەخشێ ئەندەرپاسا نێزیک قوتابخانا سەفین کرین، ب رێیا وان گوھۆڕینان ئەم یێن شیاین ژ ئاریشێن مولکداریێ رزگار بین، چونکو وەکو دیار ئاریشێن مولکداریێ ماوەکێ گەلەک زێدە دچیت و تێچوویەکێ مەزن لێ دچیت، لەورا مە گوھۆڕین یێ ل سەر کرین، مە شیا ب ھەمان مفا دیزاینەکا دی چێکر”.
ببەحس ل وێ چەندێ ژی کر کو ئەڤ پێنج پرۆژە کو ژ لایێ وەزارەتا باژێرڤانی و گەشتوگۆزار رەزامەندی ل سەر ھاتبوو کرن و ل ٩/٧/٢٠١٩ دەست پێکر بوو و بۆ ھەر پێنج پرۆژان ٩٤ ملیار دیناران بوو. ٦٨ ملیار بۆ بجھئینانا پرۆژەیی بوو و یێ دی بۆ بابەتێن مولکداریێ بوو، گۆتژی: “پرۆژێن مە چێکرنا پارچەکا جاددا کاروان بوو ل گەل چێکرنا جاددەکا خزمەتگۆزاری ژ جاددا مھاباد ھەتا شندوخا و پرۆژێ سیێ چێکرنا ئەندەرپاسا ل نێزیک فەرماندا دھۆکێ بوو، پرۆژێ چارێ چێکرنا ئەندەرپاسا نێزیک مزگەفتا شەھیدان و پرۆژێ پێنجێ ژی چێکرنا یوتێرنەکێ یە ل نێزیک قوتابخانا سەفین”.
ئانکو ل نێزیک قوتابخانا سەفین ئەندەرپاس نابیت؟
“نەخێر، ژ بەر کو نێزیکی ئێکن ئەم شیاین ل رێڤەبەریا ھاتنوچوونێ و چەند رێڤەبەریێن دی یێن شولەژێ رێک بکەڤین و گوھۆڕینەکێ ل پرۆژەی بکەین ھەر بارگرانی ژی ل سەر حوکمەتێ ژی سڤک بیت و ھەر ژی نەکەڤینە د بابەتێ قەرەبووکرنا مولکداریێ دا”.
ل دۆر وێ چەندێ ژی کو پارێ ھاتیە مەزاختن بۆ ئەندەرپاسێ بوو و ھەوە گوھۆڕین لێ کرن و کرە یوتێرن، سەرپەرشتێ پرۆژەی دبێژیت: “مە گەلەک گوھۆڕین د ڤان ئەندەرپاسان دا کرن، د فرەھی و بلندکرنا گێردەران دا و ئەڤێن ڤێ دووماھیێ مە بانێ وان ژی ھێلا ڤەکری، ئەمێ ڤان ھەموو کاران دکەین ل گەل یا ل نێزیک قوتابخانا سەفین کو نێزیکی ٢٤ ملیار دیناران ل بەر دەستآ مە بمینن کو ئەندەرپاسا چارێ و دووماھیێ ل جاددا بارزان دروست بکەین ل نێزیک پانزینخانا بناڤی دا کو ب چو رەنگەکی راوەستیان ل جاددا بارزان نەمینیت”.
ھێشتا دبێژیت: “مە بۆچوونا پارێزگارێ دھۆکێ و سەرۆکاتیا باژێرڤانیا دھۆک وەرگرتیە و کارەکێ گەلەک مەزن یێ دھێتە کرن دا کو رەزامەندیا ھەموو لایان وەربگرین کو پرۆژێ ئەندەپاسا ل نێزیک پانزینخانا بناڤی ژی بھێتە چێکرن و ب ڤێ چەندێ ژی چو ترافیکلایت ل سەر جاددا بارزان نامینن و دێ وەلاتیان ژ قەرەبالغەکا مەزن یا ھاتنوچوونێ رزگار کەین”.
ئەندازیار نەمر پێڤە دچیت و دبێژیت: “یا گرنگ مە چو پارێ زێدە ژ چو لایەکی داخواز نەکریە، مە بزاڤ کریە ب پارێ ژ بەر گوھۆڕینێن ل دیزاینێ و ھندەک قەرەبوویێن مولکداری وی کۆژمێ پارەی بدەینە لایەکی و ئەڤی کارێ مەزن پێ بکەین دا بشێین ب رەنگەکێ گەلەک باشتر خزمەتا وەلاتیێن خوە بکەین”.
ماوێ پرۆژێ تەمامکرنا جاددا کەمەری یا ب ناڤێ کاروان و چێکرنا جاددا خزمەتگۆزاری یا ل سەر جاددا بارزان و چێکرنا سێ ئەندەرپاسان ٩٦٠ رۆژن و کۆژمێ ٩٤ ملیار دیناران بۆ ئەنجامدانا وان پرۆژان و قەرەبووکرنا مولکداران ھاتبوونە تەرخانکرن.
